藍天行動令所有混能車即減牌費，但仍有人對 Hybrid有保留，認為又貴又無力。當你對住架凌志GS450h四日三夜後，會發覺喺極度豪華舒適下，掂住油門居然畀到你推背嘅感覺，黑漆漆嘅GS夜麻麻喺「屯公」發力，一路飆一路幫你慳油錢，午夜快車同藍天行動，居然出奇地夾。
凌志 GS450h繼承 Aristo跑車血統，上一款 GS300已經跑贏好多所謂辣車，想試呢架新嘅混能版好耐，今次終於有四日三夜任我舞。
■混能車都有推背感，加速力令人相當驚喜。
■ 6速加減波，疾飆再拖波入彎都好靈敏。
混能都可推背
頭兩日只喺市區小試牛刀，但短短一段環保大道，已體驗到掂吓油門都有推背嘅加速感，仲要係上緊斜依然爆住去，呢種轉數急速爬升嘅力量感，跟大cc引擎表現又唔同，邊個話Hybrid飆唔起。第三日正式拍攝，預咗玩全日，目的地係龍鼓灘，一行四人由將軍澳直入屯門公路，路線揀咗由荃灣經深井，再直入黃金海岸。經過初步熟習GS450h後，已有信心稍為加速，全程+/-波試埋波箱反應。幾個燈位起步輕易攞到有利位置，彎位由 5波稍為拖番落4波，已可順利攻下，除有足夠扭力去抵抗 G-Force作用力外，車架剛性都真係值得一讚。
■內櫳闊落舒服，身處其中根本察覺唔到係一架辣車。
■雖暗藏電池，但尾箱仍然擺得落一個大篋。
飆住慳油錢
唔知係沿途實在太爽太順，抑或 37℃烈日當空、個個戀棧GS450h嘅舒適，無人願意落車影相，結果遊足幾粒鐘車河，直到日落西山天都黑埋先影完相，但全車四人感覺舒暢，唔會話屈到頸梗膊痛。有跑車戰鬥力兼具豪華內櫳，仲要每一腳都幫你慳到油錢。行咗幾日，大概消耗半缸油，計番路程實際耗油數字為$1.8/km，比同門其他混能型號稍高，但唔好忘記佢用電以外，仲有一副 3,500cc汽油引擎，最大馬力去到三百幾匹，呢幾日玩埋速度同高轉數，兩蚊唔使真係無乜車做到。
■車廂佈局一貫豪華舒適，幾乎數得出嘅設備佢都有。
■收埋嘅大堆 Function竟然係屬於側鏡㗎。
■最愛輕觸屏幕，將一大堆功能按鈕收藏妥當。
■前排冷暖椅，揸咗一日車 Pat Pat都咁爽。
車手實試 GS
要試凌志 GS，梗要搵番專改 Aristo、去埋新加坡鬥車既 James同 Ray，實牙實齒地試吓架全原裝嘅 GS450h 30分鐘，睇吓兩位房車賽同飄移賽高手有乜評價。
好豪華，隔音好行車靜，阿龍今次俾你累死喇，可能要買車！加速好有力，稍嫌軚盤輕咗啲同避震唔夠硬，高速時唔夠穩定。」
幾鍾意佢跑得嚟又坐得舒服，只嫌車頂較矮。操控上嘅缺點係熄咗 TRC（循迹系統）無乜分別，剛才甩迴旋處依然幫我 Cut油收 Brake。」
規格
引擎： 3,456cc V6＋電摩打
馬力： 296ps/6,400rpm（總馬力 345ps）
扭力： 368Nm/4,800rpm
傳動： 6速 E-CVT波箱，後驅
售價：$652,340
 |
發表於 2009-7-28 08:30 AM
| 
