日內瓦車展直擊（二之一）： VW入屋七小福晒冷

nt1972

屬全球最大型嘅日內瓦車展正式開鑼，除咗波子 918同 Audi A1外，今年矚目新車數量唔算多，不過最 Hit嘅環保同概念車都有啲睇頭。最搶嘅係VW一口氣 Show咗七款將推出嘅新車，唔係超跑唔玩怪樣，踏踏實實，勝在全部抵玩兼實用，夠入屋。

雖然對比起法蘭克福車展，日內瓦車展佔地無大得咁誇張，總算用腳可以走勻場館。但話雖如此， 3個主館共 7個Hall，仍比東京車展大上約一倍，福士集團幾個牌子，就霸咗差唔多大半個主館。未曝光新車亦係佢哋最多，其中單單 VW，同場已經有6款，計埋上年公佈過嘅 Blue Motion，成 7款新車聲勢十足。呢 VW七小福繼續力 Show本身強項，以抵玩實用搶佔市場，其中Polo GTI、新款 Touareg同 Sharan，更大有機會率先嚟香港。




Amarok：


福士加入農夫車行列，個斗唔算太大，勝在四門兼有後座，乘客行先。

Cross Polo：

變種應付崎嶇山路，提升懸掛同避震高度至 15mm，揸同坐都更舒服。

Cross Golf：

概念跟 Cross Polo相同，不過車身高度提升至 20mm，行石路都未驚過。

Polo GTI：       

食住五代 Polo個勢，新 GTI版升級到 180匹同七速 DSG波箱，賣相更似 Golf GTI，不過更輕更的骰，兩者可算係唔同玩法。

Sharan：

好期待呢款新 SUV嚟香港，事關中尾排玩百變都玩得招積過人，手拉位設計得好，輕輕一拉一堆座椅全部隱藏晒。

Touareg Hybrid：

VW第一款混能車終於曝光，未試有幾慳油環保前，齋睇全新造型，都算幾吸引。

Blue Motion Polo：

上年德國車展已曝光，同系列包括 Golf、 Polo同 Passat車款，以慳油同環保為主打。

免費 Apps       

福士都趕 iPhone Apps潮流，免費任人 Download試玩，程式包含揸車 Game、展館地圖甚至日內瓦旅遊資訊。








MINI殺手登場
一早知道 Audi有部「 MINI Killer」將在車展現真身，挑機成唔成功尚言之過早，不過揭布亮相嘅一刻， Audi展館又係塞爆人，證明 A1呢架的骰揭背車仔實在令唔少人期待。同場擺晒 1.4同 1.6版本，連行電嘅概念版 e-Tron都有得睇。


■全紅車身襯銀色柱位， A1賣相極之吸引。


■ e-Tron嚿電擺喺尾廂，設計好有科幻感。


■雖同為揭背細車，不過玩單門，跟 MINI市場又不盡相同。


■第一次近距離接觸開篷版 R8，隻金色勁襯新一集《 Iron Man》。

波子王忽然彈出Porsche認真夠晒驚喜，車展前無小道消息爆過會出新車，以為得架 Cayenne混能版，點知彈咗部 918 Spyder Concept出嚟。雖屬概念版本，不過造型實在太爆，超科幻曲線車身，車側左右居然有氣喉，連軨都識發光。


■ Cayenne Hybrid採用跟福士 Touareg相同嘅混能偈。


■蓮花 Evora推出無耐，已順應混能潮流，馬力更達 414匹。


■ 918 Spyder Concept玩到咁科幻，居然亦保留到波子味道。


■兩側氣喉，發光軨，另類戰鬥格。

Geneva Motor Show
日期： 3月 4-14日
網址：http://www.salon-auto.ch/en


■ VW發佈會未開始，已經人山人海，勁誇張。