全城談論已久嘅港產電能車mycar上月尾終於正式開賣，前日仲舉行首次公眾試車，唔少參與者埋怨車細無冷氣兼動力不足。我並唔係一個死硬環保支持者，只係用車迷嘅角度客觀實試，得出嘅結論：比想像中出色！
全方位睇 mycar
側睇頗有玩具 Feel，但感覺醒目，再睇車頭及車尾，線條明顯方正帶剛陽味，趣致得嚟帶點型格。
靚仔外形 大師手筆
■尾燈組合採用 LED設計，取其極佳省電效能。
香港有部自行研發嘅環保電動車，點都係件值得驕傲嘅事，睇mycar嘅外形，就真係一啲都唔失禮。的的骰骰先天有可愛條件，不過睇真線條方正硬朗，猛男揸都唔覺搞笑。車頭大燈精靈醒目，稍為上揚嘅車尾，兩邊有立體尾燈組，頗有個性。出自意大利著名汽車設計師 Giorgetto Giugiaro嘅手筆，果然係有過人之處。mycar講「潮」，就梗係要配合各位潮人嘅獨特口味啦，所以買家可隨個人風格任意挑選組合各種配備，由座椅用料、車身顏色、輪圈Size、空調設備以至電池物料等，都可以隨心所欲揀到最合心水。就如今日所試嘅基本版，配 14"鋁合金胎軨，買家就可將之提升至15"，座椅物料亦可由絨料提升為皮革等，畀晒位你展現個人風格。
1.只可坐兩人嘅車廂唔算太狹窄，一般身材嘅男士都坐得舒服。
2. mycar全線採用 HID氙氣頭燈，令夜間照明範圍更廣闊。
3.中控台佈局時尚易用，軚環雖然不設動力輔助，但路面感相當豐盈。
4.兩片鋁合金腳踏位置有少許偏左，一貫傳統歐洲車作風。
5.短小波棍向前推係前波，相反後拉就入後波，極易上手。
6.合金輪圈基本 14"，買家可額外選配 15"，操控與賣相都得以提升。
一手掉頭 靈活超班
■車後行李箱容量 88升，相當小巧。
mycar嘅車架係採用堅固防禦管狀鋼架設計，車身由玻璃纖維製成，全車總重量只有 726公斤，最高時速仲有成50-64km/h，雖然唔上得高速，但係代步都應該Ok啦。坐上司機位，意外地唔算逼狹，頭頂及腳部空間都充足，舒舒服服撻車出發！撻車，部車似乎無乜回應，不過原來已經可以起動。一手握住都幾有跑味嘅軚環，一手推波棍，有點唔習慣，因為波棍奇細，兩隻手指都搞得掂，不過就一樣有「前進」、「空檔」及「後退」波檔。起步嘅力量感又比想像中強，速度感亦無令人失望，跟汽油車最唔同嘅，應該係行車時驚人嘅寧靜，只可惜測試路段只有平地，未能了解爬坡嘅表現。再嚟掟個急彎，竟然出現驚喜位，mycar嘅軚輻角度超大，轉彎弧度極細，最小轉向半徑 3.9M，平時三手軚嘅窄路掉頭，佢一扭即掂，靈活超班！不可不提，mycar一年牌費只係$440，計落條數，支持環保又點會係犧牲？
上電話咁易
我相信 mycar令人最好奇嘅，要算係叉電問題，要用專門叉電接頭咁就大件事！首先就即時同大家睇睇！mycar嘅叉電位設於車身右側尾燈旁，打開蓋掩係一個三腳插，接駁一般家庭插頭就已經可以為佢上電！基本嘅鉛酸電池 6至 8小時充滿電，可行70至 112公里，由屯門走轉數碼港睇戲都綽綽有餘。如果提升為鋰鐵蓄電池，更可快速充電，一小時內可充電達 80%！
規 格
電機類型：中置式 48V直流電機
時速： 50-64km/h
電池：鉛酸蓄電池充
電器：交流電輸入 100-240V＠ 50/60 Hz
充電時間：6-8小時每次充電
可行里數： 70-112公里
車身尺碼： 2,653mm× 1,401mm× 1,408mm
售價：$97,000起
 |
發表於 2009-11-2 06:05 AM
| 
發表於 2009-11-2 11:58 AM
| 
