瘋狂版 MINI嚇怕 Rock女

我會叫麥家瑜（ KEEva）做樂壇特別版新人。特別在個英文名、特別在黃貫中幫佢作曲、特別在可愛少女竟愛 Rock。特別嘅KEEva，原來仲鍾意特別嘢，咁呢架 MINI特別版係佢杯茶啦。點知 KEEva俾 MINI靚樣迷倒，但就無膽馴野馬！

無膽馴野馬

■咪睇 KEEva少女味濃，其實 Music愛 Rock，買車要夠型。

隻身由加拿大回流香港加入樂壇發展歌唱事業，佢令人最有印象嘅新聞就係爸爸係出色嘅音樂人， KEEva不避以此作話題，眼神還帶有一點點敬意。「香港以前唔多Studio，爸爸嗰間有好多歌星樂隊會嚟錄音夾 Band， Beyond係其中之一，所以細細個已經日日聽住 BandSound大，潛移默化之下，家特別鍾意 Rock Music。」講完音樂，係時候講車，成日有人話喺加拿大無車代步有如跛，斷估KEEva手車唔會差得去邊。點知呢朵溫室小花立刻原形畢露，騰晒雞擔心要佢試辣車露兩手，「我以前喺加拿大都會揸車返學，但返到香港未揸過，啲路太窄，好驚，一有車逼我就會嚇死。」呢架 MINI JCW特別版最特別嘅地方，就係由 John Cooper Works親自操刀重新Tune過副偈，加大 Turbo，將馬力提升至 211匹，啟動埋個 Sport Mode，直頭好似隻野馬咁強勁飛馳，KEEva最終唔敢親自上陣實在有啲嘥料。

■天幕天窗，對車仔提升開揚感有莫大幫助。

■特別辣嘅 MINI內櫳依然保持可愛風格。

■黑底紅字嘅 6速手波棍係其中一個特別版獨有之處。

■轉數錶可以另加裝 JCW版獨有嘅轉數顯示燈提示轉波，當然要加錢啦。

貪型扮反叛

■自言揸車係騰雞王，暫時未敢喺香港揸車。

雖然喺加拿大日日揸住架 Toyota Matrix周圍去，但亦不難明白KEEva揸車會如此驚青，因為訪問中多次提到嘅「唔俾」都不能盡錄，「屋企人唔俾我16歲時去考牌，太細個揸車會危險。」「爸爸唔俾我買黑色車，話路黑易出事。」 KEEva曾經好想買部粉紅色 MINICooper，最終都因為「唔俾」而告吹，「佢哋話細車有意外時會危險啲。」吓……不過 KEEva談車只論其貌不論其速，見到呢部火紅MINI一樣表現興奮。「 MINI嘅外形真係好百搭，可愛又得，型又得，呢部JCW版嘅紅黑配搭又有啲古典跑車味，仲要係特別版，真係引死我。等我摸熟少少香港啲路，都好想買番架 MINI，不過就可能會買黑色，夠型。」KEEva終於流露出些少少女嘅反叛。愛型倒不如考慮吓呢架型到盡嘅JCW版啦！有跑味又造型特別嘅泵把同尾翼，又有大量碳纖粉飾，夠晒惡相。想再特別啲，JCW版有好多獨有配件，好似轉波提示燈同跑車桶椅等，都係唔少 JCW版車主嘅熱門選擇。