鯨吞 1,690公升　五代街霸晒胸襟

唔係 Facelifted小改款，新世代掃把佬回歸，惡樣霸氣返晒嚟。早前試過第五代 Legacy GT，呢位有江湖地位嘅車壇大佬輩，再度變陣成SUV，外形依舊威武，尾廂空間最大可達 1,690公升，絕對係胸襟廣闊嘅街霸。

GT內櫳空間暴增

■尾睇風格頗斯文，不過就一副 SUV格局，殺氣亦銳減。

Subaru向有街霸美譽，身為五代大佬，呢款 Outback版可謂跟同門 GT版完全兩回事。 GT版似着住西裝嘅任達華，斯斯文文但你絕不敢侵犯；而Outback版定位係 SUV，加大胎軨、升高懸掛，令車身增高不少，配襯 18"合金軨，擺明高你一截，就如做咗揸Fit人嘅張耀揚，同一條馬路並排你都唔敢對佢眼望望，絕對霸氣十足。 Outback保存到跟GT一樣嘅內櫳，但尾廂空間大幅加碼，當然唔少得時興嘅百變座椅玩法，放低尾排打通尾廂後，空間容量達到1,690公升，擺十幾個紙皮盒簡直濕濕碎，呢啲就係 Man Power喇。動力方面跟 GT版一樣，採用 2.5L水平四汽缸引擎，但既然定位為SUV休旅車，火氣亦毋須太過剛烈，所以不設 Turbo，馬力為 167匹，配搭 CVT無段變速波箱同軚波撥片，基本上已毋須怕人踩場挑機。

■尾排一按自動摺埋，尾廂空間暴增至 1,690公升。

■難得跟尾廂共存嘅尾排仍能保持闊落舒適。

■採用 CVT無段變速波箱，想爆啲，大可轉 M Mode玩+/-波。

■大量金屬質感面板，令豪華車櫳帶時代感。

收火更實用
內櫳繼承五代 Legacy闊落＋真皮軟熟座椅血統，金屬感重嘅中控台及內門側襯飾，令整個感覺更豪華舒適，而且車價30萬有找，已經包攬唔少豪華裝備，如 HID頭燈、 10方向連記憶電動座椅、後排獨立冷氣、白色冷光錶板、無匙系統等，比同車價SUV更為抵玩吸引。雖然內櫳跟 GT版近乎一模一樣，不過兩者車格上仍有分別。 GT版有 Turbo及 SI-Drive動態系統，而Outback版就實用掛帥，火氣係無咁猛，但最重要係比 GT版足足平5萬蚊，仲要再加送軚盤控制藍芽裝置、落雨感應自動着水撥等，其實已經相當抵玩。同樣係五代Legacy，兩個版本一文一武無話邊個叻啲，點揀就要睇你係吳啟華定黃德斌喇，當然，若你似呂良偉咁叠水，咪一次過買晒兩架囉。