長測大胃王掃把佬鯨吞橡皮艇

架架 SUV都 Claim自己內櫳有幾闊落， Subaru架新 Outback更誇到尾廂空間可達 1,690公升，成架貨 Van咁滯。經過四日三夜長測，未講好力豪華體貼舒服前，淨係睇佢吞得落成架雙人橡皮艇，足可封佢做車界大胃王。

作為 Subaru最新 SUV， Outback最引以自豪係個大得誇張嘅內櫳，作為長測車種當然唔可以留手，就揀夏日最多人玩嘅沙灘活動，睇佢到底有幾大吞吐量。去到沙灘士多，先後揀過天鵝、鱷魚甚至大鯨魚，但擺落 Outback尾廂度，呢堆「動物」忽然縮晒水，最後索性揀架全場最大嘅雙人橡皮艇，居然塞得落，更加係毋須夾扁之餘仲要鬆動有位剩，擺埋一行五人嘅隨身物品同攝影器材都無問題。雖未至於大到嚇親人，但每個人心裏都認真佩服 Outback嘅鯨吞能力。梗係啦，後排座椅剔吓個掣就可摺低，變成 180度完美大平台，空間容量暴升到 1,690公升，真係點只有本事幫手搬屋，扮埋流動部屋都夠晒份量，車價都只係唔使 30萬。有讚亦有彈，車身高，尾門升起後更高，但不設電控尾門，對細粒女士嚟講，就算跳高都未必夠力閂門喇。

設備多夠慳油

■新一代 Outback車身頗高，斯文中隱現霸氣。

四日三夜長期測試，必定發掘到更多新車好玩之處。所有功能按掣，有日系車款嘅直覺式優良傳統，係咁意揸一轉已足夠摸熟啲設備。而以車價嚟睇，實用設備多過同級對手，如電鏡、電天窗、電控椅、藍芽、軚+/-波、冷暖凳等，呢堆配備人哋當 Option， Outback就屬 Standard，全部跟車附送，搞到「掃把佬拍住韓國佬」，韓國車車價買日本車享受啦。試車幾日全部試勻晒，尤其大熱天時，有「急凍」效果嘅超強冷氣，同埋冷暖凳嘅低溫效果，熱辣辣上車都好快令人 Cool Down，唔再身水身汗發。性能方面， 2.5L水平四汽缸，算中規中矩，無 Turbo幫拖，係欠缺咗啲起圍爆炸力，但有四驅系統同+/-波，中尾段一樣可以好激，最重要係夠慳油，行足四日， Day Day過海，大部份市區路段，無大長途直路拉低耗油比率，但都只係用咗半缸油，約$1.2/km，對家庭客或斯文代步人士嚟講，當然唔使要求狂野啦。