由張繼聰（ Louis）擔主持嘅節目《正識第一》今日首播，而 Mercedes-Benz G55AMG就第一次正式讓傳媒實試。面對這部型男心目中嘅 Dream Car，一向老婆同囝囝第一、揀車愛大唔愛飆嘅Louis，坐上司機位嘅一刻，竟然原始男性控制慾瘋狂急升，原因竟然係：嗰一大堆操控按鈕！
型車放 BB椅 扣分
■多功能軚環配電話接駁及顯示屏操控按鈕，高科技配備令 Louis大叫好玩。
起初一直覺得張繼聰向主持界發展實在有點風馬牛不相及，但經過今次兩小時訪問後，我鄭重收回呢個錯誤想法，滔滔不絕嘅「偉論」、無時無刻扮鬼扮馬、甚至亂說一通，都引得一行 9人笑唔停口。不過猶如大細路嘅 Louis一談到車卻盡顯 FamilyMan本性，揀車用車皆以老婆同囝囝為先，「我揀車都鍾意向大發展，永遠先諗可以坐得幾多人，從來無諗過買只坐得兩個人又逼狹嘅超跑。四驅車或七人車先係首選，因為假日可以載住一家人出去郊外遊吓車河，雖然攰過返工，但嗰種快樂真係有錢都買唔到。」面對 G55 AMG呢部型男至愛，好爸爸Louis亦係得個恨字。「我最欣賞呢部 DreamCar嘅方形線條，充滿剛陽味道又有少少懷舊感覺，內櫳又夠晒闊落。之前同林海峰踢波見佢揸呢款車，我已覺得好有型，所以每次見佢喺街出現都會第一時間望吓，有次更發現個司機咁靚仔嘅？哦，原來 Chilam嚟嘅。不過暫時而言，佢只會係我嘅夢想，一來係價錢，二來個仔仲細，你諗吓如果整張 BabySeat喺架咁型嘅車裏面，即刻扣晒分啦。」
按鈕一大堆 興奮
因為住得遠，又樂意做老婆同囝囝嘅司機，Louis自言自己架車嘅里數可媲美學校保母車，更強調大家一定要跟佢一樣，學懂如何視揸車為一種享受，「喺香港養車等如租多間屋，養車嘅錢其實係娛樂開支，加上我每日喺架車度嘅時間都唔短，所以更加要學識好好享受駕駛嘅時間。好似我成日要寫歌，會比較着重車內嘅音響設備，呢架 G55部Hi-Fi啲聲都好靚，可以一邊聽住歌一邊感受擁有自己私人空間嘅樂趣。」 Louis雖然唔追求汽車帶來嘅速度感，但聽住 507匹馬力嘅Off-Road王 G55 AMG所發出嘅引擎聲，都大叫過癮。「嘩！好似獅子咆哮一樣。」不過基於 Louis認為大部份男人都係 ControlFreak嘅理論，部車最令佢興奮嘅反而係一大堆高科技配備按鈕，好似四輪驅動模式、座椅氣壓調校及多功能軚環等有排佢㩒，「揸郁得嘅嘢係男人嘅天性，咁鍾意揸車揸飛機就係咁解，連電視遙控器都唔放過。嘩，呢部 G55嘅掣多到好似飛機駕駛艙咁，非常正。」 Louis近排買咗部日產PAO，佢話係尋回浪人時代嘅感覺，唔知等到幾時先可以買番部四驅車做回他的猛男？
■車尾一條士啤胎，保留濃厚吉普車味道。
■經 AMG改裝嘅 G55，全套包圍令外形更強悍，車側當然有響朵標記。
■圓扁嘅尾燈設計配襯番 G55嘅四方懷舊外形。
■雙死氣喉設置車身兩側。
■橫開尾門夠晒原始吉普車味道，車尾更有兩排摺椅。
■ 5.5公升 V8引擎加上機械增壓嘅爆發力，有本事爆住上山頂。
■試揸完 G55 AMG，Louis第一句係：「揸完都覺得自己型咗。」
規格
引擎： 5,439cc V8配機械增壓
馬力： 507hp/6,100rpm
扭力： 71.35kgm/2,750-4,000rpm
傳動：五前速自動波，四驅
售價：$2,560,000
■ G55 AMG堅持保存四驅車嘅方形線條設計，充滿男人味嘅外形吸引 Louis，係佢第一 Dream Car。 |
發表於 2009-12-7 05:58 AM
| 