富豪 C30　換臉保童顏

整容風氣普及，鼻幾高、面幾尖、唇幾厚由自己話晒事，中女想擁有一臉童顏真係話都無咁易。一向走年輕路線的 VOLVO C30，為力保青春，亦加入整容行列， 2010年以全新臉孔示人， Facelift版塊面仔尖咗、眼仔大咗、嘴仔靚咗，仲整多咗兩個酒渦喺面頰，搞到成日好似笑咪咪咁，令童顏多添幾分生氣，越老越「年輕」。

哈哈笑鬼面罩添生氣

■ C30主攻年輕一族，簡約舒適的內櫳設計更合他們口味。

瑞典老牌 VOLVO被中國吉利收購已成事實，有咩改變暫時未知，但肯定車系繼續年輕化一洗老成形象。近年 VOLVO最成功脫胎換骨必定係揭背車仔 C30，於 07年重新包裝後已年輕不少，以長闊高只有 4,252× 1,782× 1,447mm的細小車身主攻年輕人市場。要緊貼不停求變的年輕人步伐，最新到港的 C30 2.0決定再換臉。今次 Facelift版以車頭改動為主，棄走過往感覺單調的長方形設計組合，換上全新 5點式哈哈笑鬼面罩，蜂巢圖案配大圓形車章，感覺煥然一新，配合下面呈梯形擾流器，呢個大嘴巴組合令整塊面形更尖，加上頭燈改用前尖後圓設計，一對眼仔微微上揚，令車頭充滿動感氣勢。最後兩角落的霧燈係畫龍點睛所在，新霧燈框的形態如面頰上的酒渦，為 C30的面貌帶來更多的生氣。

■由淺至深的車側骨位一直延伸至尾燈，配合到車尾品字形的起角設計。

■略嫌 16吋 5輻式輪圈設計未夠新鮮，難以滿足愛搶眼的年輕人。

■金屬 L形中控台成近年富豪標記，設計的確討好。

■黑白皮椅係我最欣賞地方，設計充滿年輕格調。

$1.15/km油耗　慳荷包

■車尾泵把由黑膠改為金屬，加埋車尾反射燈的點綴，固然更勝從前。

一向幾鍾意 C30車尾品字形的圓渾線條、全玻璃尾門，如此鮮明易記設計當然唔會輕易剔除，所以 Facelift版亦只係改動了尾泵把作配襯，由以往的黑膠泵把換上金屬泵把，由上而下連住落一幅過的車尾，視覺上帶來更貼地效果。梯形的凹凸設計不但強化車尾立體感，更可呼應車頭的擾流器設計作平衡。其實要討一眾年輕人歡心，除了外表，耗油量可以話係第二關鍵，舊年換上全新的 Powershift雙離合器六速波箱，除了可以加快換檔速度，令力量輸出更平均，亦成功減低油耗至 8.1L/100km，以油價約$14.3計算，每公里只需約$1.15，完全照顧到年輕人的荷包。加上出晒名安全的 VOLVO有 WHIPS及 SIPS等撞擊防護系統保護，又有 DSTC加強入彎穩定性，即使心高氣傲的年輕人手車麻麻，總叫做多份保障教爸媽安心先啦。