MINI ONE柔攻

nt1972

數汽車界型人潮車， MINI Cooper必屬其一，不過要型要潮往往都需要金錢堆砌， MINI車價門檻一向唔低。不過隨住 MINIONE今年終於正式殺入香港，唔使二十萬元嘅溫柔價就可以加入MINI行列！即使馬力亦稍變溫柔，但對一眾玩品味潮人而言，依然係一大喜訊。

低價攻日牌車仔
MINIONE屬家族中嘅入門級，可惜香港代理一直都無引入，令「彈藥」不多嘅車迷得個恨字。直至舊年適逢 MINI 50周年，廠方首次配額 30部50周年特別版 MINI ONE於港發售小試牛刀，結果反應非常熱烈，搞到代理一再要求廠方加推，最後爭取到 50部，更於數星期內售罄。知道MINI ONE吸引力強勁，代理終於宣佈今年開始正式發售 MINI ONE。全新到港嘅 2010版 MINIONE，定位二十萬元以下，跟一般閒閒哋都要二十幾萬嘅 Cooper相比，幾萬元嘅差價的確可以吸納更多車迷加入 MINI行列，亦令MINI跟日本品牌車仔嘅價格差距拉近，當然，以只此一家嘅歐洲潮味去攻打呢個細車市場，更似乎係手執王牌。

       

       
1.軚環雖然無操控鍵，但就一樣靚仔。

       
2.兩邊門檻有刻上 MINI ONE嘅銀色門邊踏板。

       
3.新版直四引擎由原本嘅 1.4提升至 1.6公升。


4.唔喜歡灰色帆布座椅可以加錢 Upgrade至真皮。

簡單第「壹」步


話明入門， MINI ONE向來跟「基本」呢兩隻字不能分離。外形上跟 Cooper分別不大，只係某啲部份較簡化，配備都屬最基本，好似尺碼較細嘅15吋輪圈、欠操控鍵嘅黑色軚環、由電鍍改為黑色嘅鬼面罩等等。幸好「基本」並不足以影響 MINI嘅型格。至於引擎方面， 2010年版由本來嘅1.4公升引擎提升至 1.6公升，馬力提升 3匹至 98匹，扭力亦增加 13Nm至 153Nm，雖然動力跟同屬 1.6公升嘅Cooper有一點距離，但車仔 0至 100km/h用 12.3秒表現已算不錯。你以為 MINI ONE嘅安全標準亦係「基本」貨？錯！CBC、 DSC及 EBD等全部有齊，安全配備絕唔馬虎。入教之路最後一步，代理亦細心為車主準備好，提供 MINI FinancialServices上會優惠，月供最低$3,682，加埋限量 50部作招徠，真係忍得住手至出奇。


1.睇慣之前超酷黑色輪圈，再睇 One嘅六輻式 15"輪圈，有點若有所失。


2.車頭燈賣相與 Cooper相同，惟霧燈欠電鍍邊。


3.車尾有 ONE字牌頭，好有新鮮感。

規格引擎： 1,598cc直四
馬力： 98hp/6,000rpm
扭力： 153Nm/3,000rpm
傳動：六前速自動波
售價：$199,900

靚景真身

大相咁靚嘅背景，其實係 MINI全新荃灣 Showroom內嘅酒吧，佔地更大嘅陳列室可以同時展出更多 MINI，更有電視、交車房及上網休閒區嘅設施，估計 4月先至正式開幕 o架。


■ MINI ONE正式殺入香港，二十萬唔使嘅價錢將加入 MINI行列嘅門檻降至新低。