阿仙奴班球員最叻係做啲乜？之唔係媾闊太囉。繼丹麥前鋒賓特拿後（之前同大佢 13年嘅丹麥富婆嘉露蓮一齊，仲仔都生埋，但就分咗手），隊長法比加斯亦搭上咗一個大佢 12年、本身仲有一個 9歲大嘅仔同一個 11歲大嘅女嘅黎巴嫩富婆丹妮娜。英國《世界新聞報》就話，現年 24歲嘅法比仔 1年前喺倫敦一間日本餐廳認識丹妮娜，之後雙方一直保持聯絡；而法比仔上個月同拍拖逾 8年嘅卡娜分手，咁啱丹妮娜亦同佢個地產大亨老公離婚，於是雙方一拍即合。
雖然 36歲嘅丹妮娜堅持同法比仔只係朋友，但做朋友做到一齊去法國度假，而且仲幫法比仔搽太陽油，邊可能冇嘢呀？而因為丹妮娜同法比仔個前女友卡娜個樣及頭髮顏色都幾似，搞到有傳媒之前仲以為係法比仔同前女友復合添！法比仔依家有個富婆女友照住，唔怪得盛傳佢肯減薪過家陣瘦緊身嘅巴塞隆拿啦！ |
發表於 2011-6-27 10:40 AM
| 