硬頂變開篷　車格分裂

有縮水 M3美譽嘅 135i， 306匹馬力的確唔講得笑，但高性能表現背後，其實仲有好多嘢玩，好似Cabrio版咁配番個懷舊黑色軟篷，關起時帶有點點古典跑車味，興之所至亦可隨時開篷，將135i變成親親大自然嘅極品，車格分裂卻又出奇地夾。

軟篷新形象

■ 135i本身後座已相當闊落，開篷後更見開揚舒適。

寶馬 1、 3、 5、 7系，本來各有市場定位，轉極款都唔會將車系本身特色改變，但 1系的確好奇怪，由七十年代嘅「 BMW2002」小跑車誕生，到後來 110i、 120i改玩實用揭背車，到呢兩年 125i同 135i推出，又再次回歸有尾跑車格。以為1系已定性，點知再變，踢走硬頂改為開篷車，仲要唔係時興嘅硬摺頂，以更具懷舊味嘅黑色軟篷現身，令到 1系家族特色豐富到不得了。講番Cabrio，軟篷收摺後，會完全收入自動打開嘅尾冚內，軟篷嘅多摺式骨架相當硬淨，係用上類似牛仔布料嚟做，近睇見到有質感嘅炭黑布料，懷舊＋時尚夾得天衣無縫。個人相當喜歡 135i Cabrio帶有懷舊軟篷味道，配合全車高科技感，可算別有一番風味。

■ A柱斜度及高度，亦因應開篷版而有所改動。

■免匙、桃木、隱藏式屏幕等，令 135i Cabrio更具貴氣。

■軟篷用上類似牛仔布物料，帶點新潮炭黑色紋理。

如過山車般刺激
由於 135i本身係架 306匹嘅高性能跑車，開埋篷後，加速疾衝起嚟，嗰種刺激速度感絕對令人難忘。喺上落山路中，135i又快又咬彎，感覺有啲似坐過山車，但出色嘅循迹性及車架剛性，令人High得嚟亦好有安全感。當然，開篷車一快，全車人除咗光頭攝影師外，無一倖免地忙住猛撥吹亂晒嘅頭髮，慶幸A柱改良過，令擋風玻璃有效減低前座食風程度，但坐後排嘅 Model依然走唔甩，一把長髮吹到唔見樣，不過佢一樣嘩鬼叫High到爆，呢啲就係開篷車嘅特殊魅力。 22秒開合時間算中規中矩，勝在低於40km/h時，可邊行邊開合，最佳應用唔只落雨時，就算入隧道，都可輕鬆活用呢個功能，毋須喺條隧道內捱廢氣。軟篷仲有一個好處，就係收藏時無硬摺篷咁阻碇，雖仍有一定體積，但只佔好少位，尾箱仲有大把位畀你擺嘢。