當紅 2010

講到 2010最令人期待嘅新車，一樣係體現歐日角力，三月日內瓦車展前，越嚟越多新車蒲頭，超跑 Cutie電動乜都有， Fans各有心頭好。邊部最爆？睇怕五區公投加四台聯頒都難以定論，環顧矚目之作，都不約而同地，以紅掛帥嘅最搶收視！

夢想號 LFA
2010最別具意義嘅，點計都係凌志升呢踩過超跑界嘅 LFA，首度力戰林寶同拉利，用上 4.8L V10引擎，馬力達 560匹，車身用源自F1技術嘅強化碳纖物料。賣相最得人歡心，圓中帶方勁有超跑氣勢。全球限量 500部，中國都只得10部配額，未知香港有幾多配額，只知已有一位名人成為準買家，邊個就唔講得喇。假想敵拉利唔驚新仔挑機，以 F430新繼任者 F458Italia抗敵。 4.5L V8引擎， 570匹馬力，睇規格真係同 LFA極貼近，賣點係夠輕，比 F430足足輕成110kg。另一不容忽視嘅，有 Benz人氣勁旺盛嘅 SLS AMG，一雙鷗翼沿自傳奇中嘅傳奇 300SLGullwing，搶眼到爆，配上比前兩者更勁嘅 6.2L V8引擎， 0-100km/h僅需 3.8秒。

■剛柔並濟嘅骨感線條，配上倒勾形頭燈，極具超跑風采。

■紅色配碳纖，唔睇 Logo仲以為拉利嘅軚盤。

■超跑中常見嘅電動尾翼，會因應速度而升起增加下壓力。

■雙門雙座位格局，內櫳滲入不少日式科幻 Style。

偏愛 FT-86

BMW 325is■小改款後嘅 3系，身形更流線吸引。

較平民化嘅組別一樣有睇頭。 Audi架 A1久聞樓梯響，個個以為佢挑戰寶馬 1系，點知原來瞄準更大族群嘅MINI！細車揭背格局，斜眼，大鬼面罩，望落無 MINI咁和善，相信打動到唔少男仔。 BMW335is又宣佈出擊，賣相不慍不火，依然平衡到性能同代步用途， 3.0L直六加雙 Turbo，馬力 320匹。最後一架有啲偏心，揀咗豐田FT-86。《頭 D》名車 AE86接班人，首配 Subaru 2.0L水平對向 Turbo引擎，馬力約150-200匹，但再玩尾驅，擺明賣好玩。