最快開篷拉利　限量 499 部賀 F1

為賀法拉利第 16 次攞到 F1 車隊總冠軍，集合 F430 三大型號優點於一身、成史上最快開篷拉利嘅 Scuderia Spider 16M ，全球限量僅 499 部，到港嗰部喺Showroom 驚鴻一瞥已要走人，叫價四百幾萬有錢都要諗吓先？唔緊要，香港 25 個Quotta 晨早滿晒，中咗今期六合彩都趕唔切落訂。

打破 F50 圈速紀錄
一次已經好叻㗎啦，仲要 16 次 F1 車隊總冠軍，呢個數字真係唔講得笑，背後肯定投入咗天文數字嘅研發費用同車手合約費，花咁多錢，勝在好多技術都用得番喺民用級嘅拉利上， F1 波箱就係其中最佳例子之一。咁有紀念性，廠方早已計劃推出建基於 F430 、集合 Scuderia 嘅力量、再加 Spider 開篷特色嘅拉利，取名Scuderia Spider 16M 。掛得 F1 牌頭，性能絕對有突破，廠方喺 Fiorano 賽道上作測試， Scuderia Spider 16M 就有本事創下開篷拉利嘅最快圈速紀錄，除 4.3LV8 偈達到 510 匹馬力輸出，以及配搭 6 速 F1 波箱及 F1-Trac 系統等優勝技術外，最主要係採用大量碳纖物料，全車僅重 1,340kg ，比 F430 之前嘅 Spider 足足輕咗80kg ，令到 0-100km/h 僅需 3.7 秒，極速達到 315km/h ，有馬力兼具 F1 操控表現，終於打破 F50 保持咗十幾年嘅圈速紀錄，晉身成最快嘅開篷拉利。

■ Scuderia Spider 16M 有大量碳纖同鐵網配置，可算最有戰意嘅開篷車。

■ 法拉利合計攞到 16 次 F1 車隊總冠軍，新車就係為紀念呢項創舉而生。

■ 中後置引擎有不輸硬頂版 Scuderia 嘅表現。

■ 車尾底部嘅擾流裝置極惡賣相。

戰意取代浪漫
成為最強開篷拉利， Scuderia Spider 16M 卻只係全球限售 499 部，點會唔爭崩頭？雖然香港好叻，返到 25 部，不過早已被認購清光，真正有錢都買唔到，代理都係將架車擺喺 Showroom 一日，傳媒影完相就要移走架車，相當之矜貴。 16M 有幾快、好唔好揸話唔到畀你聽，但試坐感受總可分享一下。內櫳陳設以麖皮為主，暗啞色再加上紅線車邊，自有一番高貴味道。由頭燈內框、側鏡、車尾橫柵到中控台、中央手枕位、冷氣位、軚盤及門邊等，均全部用上碳纖，想像一下，好難再有過往坐 Spider 遊車河嘅浪漫感，取而代之嘅係熱情澎湃嘅戰意。當然，男同女根本唔會介懷 16M 溫柔定戰鬥格，咁珍貴嘅車都俾你揸到或坐到，虛榮滿足感已非一般常人所能了解，呢一句，應該可以代表全宇宙整體嘅意見。