Yamaha甲殼護體型爆蝸車

今時今日要數中港兩地黎民百姓最有共鳴潮語，相信非「蝸居」一詞莫屬。不過今日介紹嘅 Yamaha中量級 S款街車 Diversion F，同屬諧音相同的蝸「車」。事關這款 10年新車除各項規格升呢外，更加上大包圍 Fairing，猶如蝸牛甲殼護體，名副其實一架有速度有賣相嘅實用戰車。

我很跑但又溫柔

■座高只有 785mm，騎上去相當舒服。

要用兩句話總結 XJ6 Diversion F的優點，就是「外形跑車化，內涵走實用」。原身是街車款的 XJ6，承上文所說，除加上了全套啡呤外，更有不少運動性嘅改良，當中諸如車頭纖薄風鏡以及盾形大燈等，令佢變成華 Dee專用嘅烈火戰車般；然而 XJ6空有「鱷魚頭」賣相，但溫馴嘅本性絲毫未有變質，易騎易操控優點依舊存在。車身座高只有 785mm，就連「腳短」如王祖藍，騎上去也頓變長腿叔叔，毋須吊腳行事；另外，為切合通常實際路面情況， XJ6的極力子磨擦點改良成極為敏感，令新車「吊」極力超爽手，以後過紅隧停車開車就無有怕。

■ LCD錶板佈局簡約，指針轉數顯示清晰。

■車頭位置加上入風口，更具跑味！

■全新設計四出一車底中鼓死氣喉，聲音勁靚！

■後座設有把手方便乘客抓緊，更備有原廠尾箱架增加其貯物性。

起撈反應敏捷

■今次有包圍護體，線條更具戰鬥格！

講番新車改動，最突出莫過於新設計四出一的車底中鼓死氣喉。佢裝設嘅位置除令駕駛感重心更優越外，尾喉發出嘅聲音亦相當獨特，更重要係新喉裝有催化器與 O2感應器，足可減排與阻止廢氣污染地球，相信環保鬥士盧盧知道後都會直豎拇指讚好！而為令騎士慳多啲高昂嘅油費開支， XJ6燃油供應採用四孔雙向式 32mm的電子噴注，簡言而之，可為你慳更多電油而走到更多嘅路。引擎制式方面，用上四衝水冷 DOHC 16活瓣並列 4汽缸，最高馬力可以爆到 75.5ps/10,000rpm，中量級表現來說可謂達標完成；而扭力值則為 6.1kg-m/8,500rpm，可預示 XJ6「起撈」反應敏捷，與其他車燈位並排起動，起碼都可以先取頭威。