Toyota Land Cruiser 4.6 ZX百萬越野Soul在骨裏

nt1972

越野四驅賣過百萬唔係新奇事，你睇凌志最新架 LX570，近 130萬車價，同門兄弟 Toyota架 LandCruiser一樣唔示弱，剛到港水貨頂級版ZX，齋睇款唔似值「一球」，原來高貴靈魂全在車廂，幾乎噏得出嘅豪華設備佢都有齊。



■四驅 SUV坐到 8個大男人，車身巨得有道理。

豪氣逼人09新款 LandCruiser分幾個版本，今日呢架為最頂級豪華版 ZX，晏晝抵港剛落船，座椅膠袋都未拆，《轆Book》已搶先試嘆呢架百萬四驅。坦白講，論外形，凌志 LX系列斯文高貴感的確高一班， LandCruiser賣相始終踏實一點，偏向筋肉型，令人誤解佢貴極有限。但一打開車門，果真車不可貌相！大量桃木加金屬飾邊，配襯高級皮櫳，豪華感湧埋身。座椅曲位設計符合人體工學，前排電動調校角度，仲有冷暖功能呵護你。加埋前排手枕位隱藏雪櫃仔、中排獨立冷氣風口等，全車都咁爽！見到司機位幾十粒掣，Function多到似揸飛機，手忙腳亂都唔知試邊樣先好。中控台最 Powerful，一個特大 8"TouchScreen，掌控音響、藍芽、前側鏡頭同後泊鏡頭等。不過雖有 GPS但欠缺中文同香港地圖，透過 PHS手機更新地圖、豐田獨有嘅行動資訊系統G-Book mX Pro一樣用唔到，較可惜。


■前排座椅具冷暖氣調校，一年四季都揸得咁舒服。


■前方手枕設迷你雪櫃。

懸掛大幅升降
中後排一樣百變過癮。少有車款連中排座椅都設電控調校角度，又係豪嘅表現。雖然新車落地，未能安排試車，不過 LandCruiser出名越野性能夠堅，睇埋引擎規格， 4.6L V8偈，就算車身重量近3噸，一樣好爆好飆，喺香港真係夠行有突。咪以為佢玩得咁豪就好錫身，除咗全時四驅系統大大力，新版 LandCruiser有個超強越野功能，就係懸掛能大幅升降，高低差距足足達到110mm，遇到上壆或勁凹凸嘅惡劣路面，都唔怕揩到車底咁肉赤。透過中央手枕按掣，一按即時變換 Sport同Comfort模式，避震軟硬靈活多變，廠方更聲稱 45度上斜、 44度左右傾斜， Land Cruiser一樣穩如泰山，堅！


■駕駛艙功能多多，幸按掣佈局有序，唔會頭都大埋。


■前側後四個鏡頭，監察範圍夠廣。

  
■「 LO」及「 HI」懸掛模式，高低相差達 110mm。




Cruiser ZX較 Lexus LX更具肌肉硬朗感。

Toyota Land Cruiser 4.6 ZX  
引擎： 4,608cc V8
馬力： 318PS/5,600rpm
扭力： 460Nm/3,400rpm
傳動： 6速+/-波箱，全時四驅
售價：約$1,000,000

hjw007

感謝樓主分享