BMW創新招扁 SUV變 GT

車嘅種類越嚟越難分，尤其創意爆燈嘅 BMW，繼 X5、 X6明明係 SUV，都可變種成 SAV同 SAC後，今日率先到港嘅 550i，更冠以GT之名，將 5系跑房混入休旅車特色，莫講話媲美同廠嘅 7系，直頭連 SUV都贏埋。

一隻尾門　兩種開法
呢兩個月唔少新車熱鬧登場，今日加入戰團嘅係 BMW 550i GT，新加賣點好多，但最出位都係加入大量 SUV元素。首先車身比一般 5系長157mm，軸距更達到 3,070mm，車廂前後空間仲長過 X5嘅 2,933mm，直逼同廠最豪嘅 7系，簡直如一架扁長化咗嘅SUV。有休旅車嘅闊落空間，連百變座椅同尾廂都 Copy埋， 590L尾廂容量已經大過 5系同 7系，完全放低尾排後，更暴增至1,700L，只係同 X5相差0.05L咋！最鬼馬都係個雙開式尾門，平常開閂細門攞輕便嘢，必要時可整個尾門向上揭起，大大件行李都擺到，而且兩種開法都係全電動，連用力向上揭嘅力都慳番。

■一道尾門兩種開法，方便存放不同 Size嘅行李。

■車尾暗藏兩個尾門開關，㩒一㩒就開到。

■放低尾排後，載物空間達 1,700L，媲美半架貨 Van。

8速波箱　慳油順手

■白襯黑內櫳，少量木質點綴，高級豪華。

550iGT外形偏向 GT轎跑格局，動力配置同樣唔失禮。首先用上 BMW高效能引擎概念 Efficient Dynamics至 5系 GT，而屬頂級嘅550i GT，跟最新 X6一樣，用 4.4L V8偈加 Twin Turbo，馬力達爆炸性嘅 407匹，佢係架四門 GT，斷估無人會踩到盡玩5.5秒 0-100km/h啩？配埋旗艦級 760i先有嘅 8速波箱，發力順暢，直接減低耗油約6%及更低排廢。揸嗰個順手，坐嘅就一樣係享受，白色皮櫳配黑色中控及面板，再橫拉一條高級木料點綴，整個車廂豪華高級，加上天幕式天窗、四區獨立恒溫冷氣以及超闊空間，基本上 550i GT可定位為長途旅行用嘅車。