家庭房車多以實用行先，但如果性能可以高啲、款式潮啲，又何樂而不為呢！好似 Mazda 3的四門房車已經好使好用，最近推出 S版，換埋高性能引擎，再換埋五門揭背，不單止更實用，駕駛樂趣都即時提升。
引擎加強至 2.0
■換上 2公升偈，令馬力增強 36匹。
Mazda 3向來有不少捧場客，原因好簡單，約十七萬蚊就可以買到 1.5偈四門房車，仲有齊 Smart Keyless免匙系統、天窗、七速加減波等超班配件，於日圓滙價高企的時候，質素已屬超值，且香港房車客都以經濟為原則，代理雖有不同配備，但都以 1.5偈為主打。如果價錢相差少少，但有多幾重享受，都是值得考慮。就如 Mazda 3新推出的 S版，同樣採用全鋁合金 S-VT引擎，但換上 2.0偈，波箱亦改為五速+/-自動波，令原本 111匹馬力增至 147匹，雖算不上很強勁，但以揭背車來說，絕對能帶來不俗的駕駛樂趣。在港島區東區山路兜了一轉，感覺揭背式設計令全車更輕巧靈活，出入彎路定力十足，令加減速反應更快更爽。不過美中不足的是設於軚環上的撥片 Size稍為短小，大男人用起來會有點不便。
■天窗雖不算大，但為遷就揭背外形，絕對可理解。
■揭背車最大好處之一就是擁有大尾箱。
■駕駛座及中控台沿用一貫簡約風格。
■雙圈式錶板，外形醒目。
■有了免匙系統，撻匙都慳番好方便。
■有軚環加減撥片，更享受駕駛樂趣。
換上揭背更靈活
除性能有分別外，內櫳亦花了不少工夫，車廂換成真皮座椅，感覺明顯高一級。至於外觀方面，既然是新版本，採用兩種級數的配件絕對合理，其中車頭的鬼面罩沿用萬事得家族式面譜，但配置銳利頭燈及全車強而有力的骨線設計，充滿野性跑味。另外削走車尾箱，換上揭背，感覺更 Young，再將後座椅摺叠後，足以騰出大量空間，靈活性強，無論載人或暫時充當「送貨車」都綽綽有餘。不過一般家庭客，買車時當然計定數， Mazda 3S雖然價錢接近 20萬，但與 Mazda 3相比只相差$20,000，但就換來更高級享受，係咪着數就要自己衡量喇！
Mazda 3S規格
引擎： 1,999cc S-VT
馬力： 147ps/6,500rpm
扭力： 18.6kg-m/4,500rpm
傳動：五前速+/-自動波
售價：$192,990
|
發表於 2010-9-8 06:33 AM
| 