金剛唔夠味揸 Defender　估佢唔到冒險王

憑《女王辦公室》戇直契仔一角成功入屋嘅金剛，個個大讚佢搞笑、演技好。儘管天生一副剛陽味極重嘅佬格，但一樣可以純情可愛；即使對住跟佢外形匹配、 Raw味型格嘅 Defender 110越野車，金剛一樣 say no！「等我 45歲之後先啦，唔夠老揸，無嗰種味道！」無論演角色定揀車，我估佢最想讓大家知：其實佢只得 29歲，仲好後生，冒險男還要闖一闖呢！

養車要計數
之前認識嘅金剛，淨係記得一個講嘢唔正嘅光頭佬喺《超級無敵獎門人》入面玩得好癲，直至佢決定留港發展加入 TVB，演出機會漸多，喺《女王辦公室》入面飾演陳永仁，生鬼表情引得更多觀眾留意。何解要隻身由台灣來港闖天下？佢用半鹹淡廣東話講出原因：「因為我係男仔，就係咁簡單，試吓無壞。」自問工作上無咩唔敢試，「我做嘢都無乜驚過，（算唔算大膽？）以前後生好大膽，家慢慢唔大膽，哈哈。」拍三級片都得？「咁又唔得！嗰啲要太大膽。」至於揸車膽量，金剛一樣大，喺台灣 18歲即考牌即開始揸車，年少氣盛夜夜笙歌，玩完無瞓第二朝冲個凉又揸車開工，晚晚如是。試過瞓着兩次，一次撞車先識醒，另一次要後面啲司機衝上嚟拍門先醒，「其實好危險，之後都無啦，太攰都唔會揸。年紀慢慢大自然會識諗，好似我鍾意揸車咁，以前鍾意速度感，家就鍾意周圍去好舒服嗰種感覺。」自言留港發展係加速成熟嘅主因，識諗之餘，更學識計數。「家唔心急喺香港買架車，所以申請咗車牌成年都未攞。一來香港唔熟路，二來人大咗就要學計數，我都有自己生活嘅壓力，香港牌費貴、油費貴，暫時都唔諗咁多住喇。」

■一副剛強表情，襯番部 Defender，金剛即時又好 Man。

■軚尺轉向齒輪比率較大，掉頭轉彎實在要多加苦練。

■咪以為 Defender好簡陋，其實冷氣、音響呢啲根本配備有齊。

■座椅係防水防污一流嘅尼龍料，周身泥上車都唔怕污糟。

等待 45歲的一天

■對將來，佢話唔敢諗太多，不過就擺出一個冀盼表情。

雖然香港未有車揸，但每次返台灣一定會揸住自己部 Subaru Legacy周圍去。「我覺得車一定要自己揸嘅！因為自己揸車可以控制好多嘢，好似時間咁。」有錢都唔請司機？「司機都請 o架！坐隔籬嘛，我落車要有人幫我泊車。」咪睇金剛外形粗獷，原來揀車愛斯文，最鍾意旅行車。「家嘅 Dream Car係平治 C63 AMG Estate，唔止又型又靚，嗰種推背感，嘩！」超跑呢？「超跑成日揸會好辛苦，又要成日好型咁，好攰 o架。」借來心目中同佢外形襯到絕嘅 Land Rover Defender 110畀佢玩，點知佢大叫未係時候。「我都好鍾意 Defender，夠 Man又夠 Old school，性能勁，柴油又夠慳油，但我會揀 Pick-up款。不過都係要等多幾年， 45歲之後先打算買，後生仔揸無嗰種味道。」柴油偈唔單止慳錢，仲符合歐盟 5型標準夠環保，低轉時扭力輸出特別強勁，無論上山定下海都難佢唔倒，啱晒鍾意揸車又愛冒險嘅金剛，其實我好想講：「使乜等到 45歲，你夠晒味 o架喇。」