[時事討論] 懶蟲教愛國 愈教愈大鑊

d82622

大家有冇讀過或者聽過《三字經》？嗱，唔係粗口版三字經呀，更加唔係導致「巴士老粗肉搏四眼男」嘅令壽堂問候語句，而係極具啟蒙意義嘅真正經典。《三字經》有云，子不教，父之過，教不嚴，師之惰。簡簡單單十二粒字道盡教育精髓，為人父母者必須為子女提供學習機會，而為人師表者就要為學生提供嚴肅教材。萬一老師太懶惰，後果自然係誤人子弟。功夫茶之所以發思古之幽情提到《三字經》，無非因為香港嘅教育工作者實在有太多懶蟲，「師之惰」簡直可以話係「師之墮」，墮落個墮。好似嗰個公民教育委員會咁吖，既然掛正招牌有「教育」兩粒大字，假假地都算係半個為人師表，哈，死得佢吖，懶到出汁！本報記者翻查紀錄，公民教育委員會嘅開會次數唔單止少得可憐，而且出席率極低。呢一個簡稱公教會嘅組織，一○至一一年度總共開咗四次會議咁大把，二十七名委員之中，僅得七人開足四次會，其餘人等放飛機缺席居多，其中六人出席過一次會議就算鬼數。公教會轄下主責推廣國民教育嘅國民教育小組，開會同出席情況更加慘不忍睹。上年度只開過兩次會，十三名組員僅有五人完全冇缺席，當中有四人嘅出席率竟然係零。零出席率係乜嘢意思呢？意思就係話，香港嘅國民教育肯定大大鑊，想話培育愛國情懷喎，絕對係癡心妄想。你知啦，愛國係非常之咁虛無縹緲嘅抽象概念，即使鞠躬盡瘁嘅萬世師表都未必教得好學生，如果交畀大懶蟲處理，情況必然亂七八糟。舉一個實例吖，孫中山當年推翻滿清政府，到底係愛國定係叛國？辛亥革命一百周年嘅今時今日，大家梗係話係「國父愛國」啦，之但係十九世紀末、二十世紀初嘅中國人通常認為「孫賊叛國」。所以咯喎，培育愛國情懷絕對係高難度動作，唔可以兒戲㗎。喂，教育局醞釀強制推行德育和國民教育，已經被批評為「洗腦教育」，假如公民教育委員會仲係成副懶骨頭，試問點樣教得好學生哥呢？家陣大部分後生仔女對於中央政府以及特區政府都冇乜好感，若然一嘢交到「師之惰」甚至「師之墮」手上，唔恨國都偷笑咯！總之，懶蟲教愛國，愈教愈大鑊。計功夫茶話齋，其身不正嘅死懶鬼好心就退位讓賢啦，千祈唔好沽名釣譽走去做人之患，誤人子弟嘅後果往往係誤港誤國，對於愛國陣營嚟講係好大罪㗎，該煨！