你以為佢係篋，其實佢係唱盤，估唔到 N咁多年來，呢句句子結構仲係活靈活現、好使好用；無錯！今次同大家介紹黑膠唱盤，仲要係連喇叭一套過大製作。
外形呃晒
■無呃你，變身做黑膠唱盤組合。
真係呃倒人！唔打開，呢部Morisaki黑膠唱盤組合，十足十懷舊黑篋。攝記一句︰「拎佢落旺角行人專區行番轉都仲得。」然後打開、賣唱，問你死未？要打開見佢真身，過程唔難，鬆開鎖扣，一左一右就係喇叭，你唔太講究音色，可以連喇叭錢都慳番；頂蓋打開就會見到主角；火牛則收在背部暗格，用時先打開裝上。可謂四四方方，絕無瑣碎配件影響。
播埋 MP3
$4,680
見佢支唱臂輕飄飄，不容否認玩味性質居多，但玩時玩，佢都有認真的一面。唱盤轉速有 33、 45和 78RPM，大細碟聽晒。新潮點！連 CD機的EQ System都有， Flat、 Classic、 Rock、 Pop、 Jazz。再 MP3年代一點，佢可以插 USB手指和 SD卡，連ID3 System都有埋；即是你條音訊有歌名、歌手名、專輯名等資料，佢可以顯示出來。再者佢仲可以錄音，用 AUX In，插另一件外置Player，借用佢個喇叭，都可以錄。當然本身播黑膠時，自然也可以錄音啦！俾大家更貪心一點，連收音機佢都可以做埋，功能多多問你服未？
■篋身收埋咗一對喇叭，適合新手試玩黑膠。
■連 FM收音機都可以做埋。
■機身按鍵位，設計好有懷舊感覺。
■唱針送埋，不過貨色只屬一般。
同場加映︰不是擴音器
$498
再介紹一件，都係玩嘢之作。你以為佢係擴音器，原來佢係小喇叭！同樣係Morisaki，表面掣唔多，高音、低音、聲量和開關。我最俾佢玩得透切係，以為佢個 Dock，有插槽插實iPhone，點知原來無，純托住，聲音輸出則靠駁線。不過，佢最好地方係可以用乾電或 USB駁電，出街用夠方便。
■用 2A電又得， USB駁電亦得。
■呃人 Dock位，果然唔係 iPhone「專用」。
■女仔單手都拎得起？一陣就得，其實唔輕 o架！ |
發表於 2010-3-18 05:48 AM
| 
