[新聞] 土耳其最紅景點貓貓去世全球Fans悼念 !

2020年11月20日週五

土耳其伊斯坦堡最著名景點之一就係聖蘇菲亞大教堂（2014年開始又被稱為「聖蘇菲亞清真寺」），有近1,500年歷史，並已列入為世界遺產。不過教堂除咗因為歷史意義吸引遊客之外，當中有一隻貓貓Gil長居敎堂被人稱為「教堂主人」，不過Gil近日就因為年老而離世，令全球Fans十分傷心。

Gil於當地出生並一直居住於聖蘇菲亞大教堂之內，一住就係16年；另一樣令Gil爆紅嘅原因係2009年時任美國總統奧巴馬到訪伊斯坦堡，參觀教堂時見到Gil仲彎身撫摸佢一下，被全球各大媒體拍到並報道，一時間令Gil成為當時全球最紅貓貓，目前IG都有超過12萬Fans。10月底Gil因病入醫院留醫，令好多Fans都好擔心，可惜最後亦撒手人寰，奔向彩虹橋，正式畢業。