議員訪粵怕「最平」

alantaix2

立法會下周五啟程到深圳 、廣州同珠海訪問，噚日有份參加呢個團嘅議員開「茶會」，聽到負責安排行程嘅立法會秘書長吳文華（Pauline）話，會搵「最平嘅酒店、最平嘅膳食」，此語一出，引來唔少尊貴嘅立法會議員反響，話唔使揀到「最平」。負責主持會議嘅林健鋒 即時話，唔好以「最平」為標準，要顧及安全問題，亦唔希望旅遊車「甩皮甩骨」。 民主黨 劉慧卿 就話，酒店唔一定要最平，要顧及衛生。Pauline回應，佢會聽埋廣東省政府有乜嘢推介，但一切會按既有守則辦事。有議員叫住宿唔好太便宜，公民黨 湯家驊 就認為每名議員6500元太昂貴，Pauline就解釋呢個只係預算。Emily諗，湯大狀貴為資深大律師，1小時嘅律師費都應該「唔嘢少」，估唔到會覺得6500元貴喎。