公仔箱論壇 - Powered by Discuz! Board

標題: 頭轆變四驅TT Coupe貼地入彎 [打印本頁]

作者: nt1972 時間: 2010-5-14 06:46 AM 標題: 頭轆變四驅TT Coupe貼地入彎

玲瓏浮凸的體形，流線身材，水汪汪的眼睛，靚女有齊咁嘅條件，梗引死人，更何況係跑車？不過有時跑車要求仲更加要高啲，除咗外形省鏡，內涵都唔少得，好似 Audi TT Coupe 2.0，講外形，去到邊度都冧得死人，不過仲未夠，加埋 quattro，咁至係完美化身。

火氣猛有作戰氣氛
轉咗款無幾耐嘅 TT，魅力有增無減，大家睇吓每逢周末晚上，有幾多架 TT穿梭蘭桂坊及蘇豪一帶，就知道佢幾受歡迎。不過有時人無完美，車，喺呢個科技日日進步嘅時代，要做到完美，梗要賣力啲。何況以 Audi技術同實力，要將車款升呢，絕對唔係件難事。現時 TT系列中，除了 3.2頂級版及 TTS擁有 quattro恒時四驅系統，今次就連小師弟 TT Coupe 2.0都配搭埋 quattro，令整個車系更加統一。改造後 TT沿用渦輪增壓引擎， 6前速 S tronic雙離合器半自動波箱，配上奧迪鋁合金車架（ Audi Space Frame）及 FSI燃油直噴技術，減低耗油之餘亦能發揮更強動力，輸出馬力達 200匹，由 0至 100km/h，只需 6.2秒。至於 TT Coupe 2.0遇上 quattro產生了甚麼火花，當然要坐上駕駛席才會知道；緊貼全身的真皮賽車座椅，令我領略到 TT體貼的一面，好感即時倍增，加上厚實的軚環，甚有蓄勢待發嘅作戰氣勢。

■在 quattro協助下，攻彎話咁易。

■ TT外形與性能，一樣奪目。

■中控及波棍都偏用渾圓設計。

四輪咬地貼住入彎

■三幅式真皮軚環，手感十足。

沉醉在這股戰意，差點忘記今次要體驗的，是 TT加料後的真正實力。既然經過換「骨」手術，植入 Audi王牌 quattro四驅系統，當然要選擇路窄多彎的西貢及清水灣一帶測試。老實講， TT Coupe 2.0過往在彎路表現曾受質疑，但加上 quattro後，彎位表現明顯大躍進，在四驅協助下，引擎動力按情況分佈於四個轆，令輪胎分別獲得所需動力，達到緊貼地面效果，入彎時車身傾側情況非常之輕微，猶如貼地飛馳，見彎過彎，更為得心應手。令 TT容易駕馭，除了多得 quattro之外，還有配置了智能式磁浮懸掛系統，選擇 Normal模式，避震表現明顯較溫柔，但當以 Sport模式行駛，其硬朗一面即時表露無遺，加上雄渾的引擎聲，當堂令人腎上腺上升。在斯文及強悍間行走，難怪 TT男女都揸得冧。

■水汪汪的眼睛足以引死人。

■倒後鏡設計雖修長，但視野甚廣。

■氣壩一樣夠晒型格。

■渾圓的車尾，見到都想親近。

Profile
引擎： 1,984cc直四 Turbo
馬力： 200bhp/5,100-6,000rpm
扭力： 280Nm/1,800-5,000rpm
傳動： 6前速 S tronic+/-波箱
售價：$506,000

歡迎光臨公仔箱論壇 (http://5.39.217.76/)