標題:
野仔8年誌慶跟少爺占撐寶馬
[打印本頁]
作者:
nt1972
時間:
2010-3-29 05:46 AM
標題:
野仔8年誌慶跟少爺占撐寶馬
以少爺占為首嘅樂隊野仔，逐步由地下走向地上，雖然近年先開始慢慢為大眾熟悉，但其實唔經唔覺佢哋已經成立咗 8年。今日拉大隊講車經，就揀咗阿占至愛嘅寶馬，佢哋將架豪華 GT玩到反轉，好彩 GT配備多多之餘，門都夠多，唔係都好難滿足到呢幾個百厭星。
①呢個天幕式大天窗正好寓意野仔近年由地下樂隊走向主流，逐漸見光嘅日子。
②阿占同 Wilson不停試玩 5系嘅各種豪華配備，認為內櫳舒服先係揀車嘅先決條件。
③ 590L容量嘅尾廂可以話係 GT版嘅一大特點，阿占都話：「好似仲大過我部 X1！」
④身為寶馬 Fans嘅阿占自言並唔特別追求車款，揸車最緊要係舒服。
忠心 Fans
■長方形智能波棍及 iDrive旋轉按鈕，係新一代寶馬標記。
六人組合野仔今日只派四子出場講車經。小胡同 Wilson間中都會揸老竇嘅車代步，而阿銘就有架電單車，最後到佢哋口中最有米嘅阿占，就揸架寶馬旅行車到場做訪問。小胡首先印證「阿占有米」之說：「野仔眨吓眼就 8年喇，呢 8年嚟最深刻就係睇住阿占細車換大車！」樂隊事無大小一向以阿占為首，訪問揀寶馬影相亦十分理所當然，因為好多人都知阿占係寶馬迷，阿占愛寶馬大條道理：「價錢相若嘅歐洲品牌，寶馬畀我嘅感覺 young啲。其實之前換車都有諗過試吓日本車，但發覺揸慣歐洲車，真係好難返轉頭。內櫳皮質都唔同，軚感實好多，一撞就知鋼水好。簡單啲講，真係開門嗰下就 K.O.你。」阿占忠於音樂同對品牌嘅堅持一樣，最近換新車都係揀番寶馬。「其實我唔多鍾意揸車，對車款亦唔太講究，不過部旅行車揸咗四年喇，再唔放就唔多值錢，所以一定要換新車。我啱啱訂咗部白色 X1， 7月先有得攞車，比起家部旅行車高身少少，但就係四驅款。」
■尾門兩種開法係一大賣點，全揭背打開時，充份展現尾廂嘅驚人容量。
■利用深啡色木紋及大量電鍍飾邊點綴嘅內櫳，充滿豪華氣派。
■同樣係用木料作提升豪華感嘅指定動作，但色調配襯卻充滿年輕感。
■真皮多功能軚環手感一流，阿占鍾情寶馬多年亦認為揸得舒適最緊要。
汽車夾 Band都奢侈
■ 18吋合金輪圈比 550i GT細一吋，不過都夠晒啦！
其餘三子雖然自謙仲未有能力買寶馬，但買唔起都一樣玩得投入，對住部 535i GT玩到不亦樂乎，車門會自動閂都笑一餐，更加不停左摷右摷試勻各種按鈕，然後齊齊大叫呢架車太豪華！阿占：「 GT豪到有啲似老闆車，要搵司機揸。」 Wilson：「我覺得夠型，最好自己揸。」小胡：「似任達華、梁家輝用嚟接小朋友放學。」爭論不休，其實車都係各花入各眼啫，不過 GT車頭偏向方正硬朗嘅造型加上蜂巢狀指揮燈嘅設計，就最得阿占歡心。阿占一向對馬力、引擎唔多熟，最叻只會問：「呢部車要入幾錢油？」咁佢一定唔識欣賞 GT嘅直六加 Twin Turbo引擎，實在有啲可惜，不過油耗每一百公里只需 8.9公升嘅表現，就應該好啱佢呢個慳家仔嘅心水。每個人對車都有唔同定義，野仔嘅睇法都算一致，認為車似係藝術品，阿銘更指：「唔覺得喺香港車係用嚟代步。」呢一刻佢哋只係一心想做好音樂，因為要夾 Band成功同買車一樣，都係奢侈品。
■阿占大讚寶馬新車設計越來越靚，蜂巢形指揮燈係其中一個冧點。
■雖然比起 5系房車車身更高，亦無損車側流暢線條。
BMW 535i Gran Turismo
引擎： 2,979cc直六+Twin Turbo
馬力： 306hp/5,800rpm
扭力： 400Nm/1,200-5,000rpm
傳動： 8速+/-半自動波
售價：$728,000
歡迎光臨 公仔箱論壇 (http://5.39.217.76/)
Powered by Discuz! 7.0.0
