公仔箱論壇 - Powered by Discuz! Board

標題: 港僅此一部暗黑蓮花贏氮氣 [打印本頁]

作者: nt1972 時間: 2010-3-24 05:43 AM 標題: 港僅此一部暗黑蓮花贏氮氣

全球限量 35部嘅暗黑版 Exige，啞黑車身配碳纖，外形流線又神秘，你會覺得蝙蝠俠應該買番部。香港僅此一部黑夜之神，搶盡收視無難度。 0-100km/h更拍住 F430，再同人講車尾收埋一組氮氣裝置，未真正較量已經贏咗個勢。

Exige一向係 Lotus頂班車系，特別版名為 Scura，就係取自意大利文「暗黑」意思。全球限量 35部已夠罕有，當中只得 10部右軚版，香港更只得一個名額，肯定唯我獨尊。叫價唔算貴，只比新款 Exige S260多十零萬，淨係份 The One尊貴感已值回票價，仲未計跟車大量 Racing配件同原廠啞黑噴油。可能你見過唔少靚車都係啞黑色，但真正原廠出品，之前都係得林寶咁做，近距離觀賞 Scura，磨砂黑配光亮拉花，再搭大量碳纖 Parts，估唔到黑色都咁有玩味。仲有原廠超貴鍛軨、全碳纖桶椅、奧連士氮氣避震等，噴油＋一堆 Options，已經唔只 10萬蚊，難怪一到港即被人買走，就算蝙蝠俠嚟到都無 Quota。

■最易分辨 Exige，係如尾龍骨般嘅車頂生風入口。

■主力氮氣樽裝咗喺尾箱。

氮氣避震更快更穩
Lotus一向以「車輕偈勁」取勝，而 Scura就跟最猛嘅 S260一樣，採用 260匹超強引擎，雖然最高峯值要爆到上 8,000轉，不過六速棍波要殺入轉數錶紅區好 Easy，而且配以 Supercharged機械增壓， 0-100km/h僅需 4.1秒，拍得住拉利 F430嘅 4.0秒。Scura另一賣點係內藏氮氣系統，雖非駁 Notebook㩒掣彈射嗰隻氮氣加速，而係用作避震之用，好處係比油壓避震更穩定，而且用上名牌中嘅名牌奧連士，成個系統造價要成 8萬蚊，碰着實牙實齒攻入彎，嗰種穩定絕可令你更安心鍊到盡。每個彎贏人半秒，足夠要對手望你尾燈做人。