吸血殭屍靠吸血可以長生不老，人見人怕！估唔到紅魔鬼都一樣，一班老將傑斯、雲達沙同史高斯今季齊齊翻生返老還童，演出仲勁過後生陣。新近成功復活就係隊長加利尼維利，上仗佢對AC米蘭瞻前顧後，嘜到朗拿甸奴一戙都冇，家陣傳媒同球迷都講緊要卡比路重召佢踢國家隊，費格遜話唔定仲會改變決定，同佢續約多一年添！
以前人人話米蘭實驗室為老將留住青春最犀利，不過睇埋AC畀曼聯大炒，三位老將史高斯、加利尼維利同雲達沙都係貢獻良多，就知紅魔鬼奧脫福一樣係為老將保住長青不老好地方。事實上，剛復操幾日傑斯一直係英超最佳中場之一，史高斯上星期仲成功到個人英超第100個入波，至於接近4張雲達沙身手亦係英超最頂級，只係大家估唔到，之前傷年半加利佬，都可以成功復活。

相比起歐聯16強對AC首回合，打右閘畀「細哨」玩殘拉菲爾達施華，35歲老將加利佬周中次回合就用行動話畀大家聽，佢依然咁堅。除成功將「細哨」箝制之外，助攻亦一樣出色，其中朗尼第一個入波，咪就係由加利仔傳中囉！
已經有兩、三年冇入選英格蘭國家隊加利佬，目前只係被英格蘭領隊卡比路視為右閘替補選擇，同曼城米卡李察士排隊友布朗同利物浦守將格連莊臣之後，如果佢想趕上進軍南非尾班車，緊賽事包括埋今晚對富咸，自然要交出好演出，博取英格蘭領隊卡比路好感。加利佬都講明，自己仲想去南非：「入唔入選國家隊唔係我可以控制，但我冇話過退出。緊我會努力為曼聯比賽，睇結果係點？」
加利佬除要睇卡比路決定，仲要睇埋費Sir決定，事關直到依家佢都仲未收到新約，不過聽過費Sir對佢讚賞，相信呢個「魔鬼隊長」奧脫福仲有排玩。