公仔箱論壇 - Powered by Discuz! Board

標題: 4日鍾情　發掘 Sonata內在美 [打印本頁]

作者: nt1972 時間: 2010-1-6 05:44 AM 標題: 4日鍾情　發掘 Sonata內在美

同人相處，「日久見真情」；同車相處，原來都要花點時間，先可以摸清性格，發掘優點。第一眼望見Sonata，典型嘅中型房車，老實講，真係覺得佢性格欠奉。但經過四日四夜嘅長測後，竟然由無感情發展至愛不釋手。無他，發掘內在美，才令人懂得欣賞。

坐得舒服　數星星
Sonata（奏鳴曲）擁有一個浪漫嘅名字，雖然這與穩重嘅房車似乎格格不入，尤其四平八穩嘅外形，很多人會武斷以為，一輛房車外形不會有甚麼睇頭。但細心看車頭燈加上霧燈，你便會知道她絕不是一般房車咁簡單，車身嘅電鍍裝飾，十七吋運動型輪圈，都為 Sonata添上不少活力。要真正認識一架車，都係要花啲時間，好似Sonata咁，花點時間，便會發掘到她有內涵嘅一面。就看車櫳，桃木裝飾，特大天窗，前後排空間闊落，司機位嘅電動座椅，有暖椅功能，簡直冬暖夏凉，唔坐過嘆過，又點會 Feel到咁正嘅駕駛感。碰啱假期前取車，呢次Sonata長測，測試路段預咗唔係返工放工咁簡單，上山下海車朋友出出入入當然少不免，果然，第一項測試便是「爬山」。食完飯後一行五人即時跳上車，眾人對超舒服嘅真皮座椅當然無詐型，但重頭戲係要上大帽山看夜景。Sonata當然無失禮，由山腳直驅山頂，在狹窄蜿蜒嘅山路，操控得心應手，完全沒有腳軟之外，入彎出彎，都穩如泰山，完全感覺唔到呢部Sonata其實都幾巨型。上到山頂，梗係要開埋個天窗睇星星，天公作美，星星都唔少，雖然成班人，但一樣感覺浪漫到暈。

■我鍾意大天窗，睇星星就最浪漫。

■我 Buy車櫳貴氣之餘都有點跑味。

■司機電動座椅加埋暖座功能，舒服到唔捨得落車。

■波棍加上桃木裝備，增添貴氣。

櫳大寧靜　 BB好瞓
第二日又係郊遊，目的地係西貢，試吓加減波轉檔，反應確係幾快。測試當然唔止咁少，假日氣氛濃烈，去完郊外，「血拼」呢啲指定動作都唔少得，Sonata車尾箱容量超大，買多多都放得落。有朋友竟然連 BB椅都買埋，當然要即時放喺後座睇睇 Sonata會唔會對BB都咁體貼。放上都唔細嘅 BB椅，先凸顯 Sonata嘅車廂的確空間感十足，雖然即場搵唔到 BB試坐，但行車時平穩寧靜，隔音設備又好，BB要大覺瞓都肯定無問題。低調沉實一向係韓國車嘅特色，浮誇當然無 Sonata份，但講到實用性，Sonata一定滿足到你要求，返工放工，同老婆拍拖 Shopping加埋 BB甚至外父外母都一樣稱心。雖然 2011年款嘅Sonata已在美國亮相，但要等新款仍要一段頗長時間。試問唔使二十萬，即時就買到架 2.4偈嘅中型房車，去邊度搵。

■電鍍腳踏，多咗貴氣之餘亦更顯活力。

■三環儀錶板，設計就稍嫌沉悶啦。

車廂寬敞　行車寧靜

放 BB座唔覺逼， BB隨時大覺瞓。

外形有氣派

中型房車應有嘅貴氣唔會少，揸去邊都唔失禮。

大容量車尾箱

尾箱容量夠大，行街掃貨好幫手。

Sonata 2.4規格
引擎： 2,359cc DOHC直四
馬力： 174ps/6,000rpm
扭力： 227Nm/4,000rpm
傳動：五前速自動波連+/-轉檔
車價：$199,800

作者: killkohz 時間: 2010-1-6 10:55 AM

hmm...2,400cc ok la...
just similar to Camry and Accord...
thanks for sharing ^^

歡迎光臨公仔箱論壇 (http://5.39.217.76/)