公仔箱論壇 - Powered by Discuz! Board

標題: GS孖住上　無迷路 [打印本頁]

作者: nt1972 時間: 2009-11-10 05:55 AM 標題: GS孖住上　無迷路

年尾各大汽車品牌嘅 2010年新車款陸續出籠，凌志孖寶 GS300同GS450h就一齊上畫，一架用傳統汽油、一架玩新潮混能，賣相就好相似，仲齊齊裝埋醒目GPS。若論邊架可以登上豪房「尚宮」之位，真係太后嚟到都審唔清。

齊齊加裝全新 GPS
凌志車系一向有兩大賣點令人印象深刻，其一係夠豪華，其二就係混能出色，豪華房跑車 GS450h就同時兼備呢兩大優點。今次推出2010年新款，帶埋車身外形屬同款嘅 GS300登場，兩者嘅重點改變就係安裝咗全新 GPS系統。小試由將軍澳工業邨出發往坑口地鐵站，GPS系統指示都十分清晰，加埋個輕觸式電子顯示屏，使用時更方便簡單，喺地圖直接 Pointout你想去嘅地方，再按幾個掣就識得帶你去目的地。好多 GPS都無辨別高低嘅能力，當天橋無到，不過據講呢個全新GPS系統更聰明，識得帶你行天橋，唔會點你行遠路，只可惜今次喺將軍澳試車未能試出真章，有機會一定要長測一試。唯一缺點就係聲音導航只得英文旁述。

■全新聲音導航系統更聰明，唔會帶車主行寃枉路。

■豪房應有嘅內櫳配備齊全，仲有桃木粉飾，增加貴氣。

兩房以鬼面罩分家

■兩車皆有大天窗增加開揚感。

外形方面， GS300舊貌不變，反而 GS450h就有個全新形象。以往同GS300一樣嘅直幼紋鬼面罩改為由粗漸變幼嘅橫紋，外貌立刻耳目一新，真係遠遠都分得清兩車之別。除此之外， GS450h配上全新款式18吋輪圈，粗幼相間嘅五輻式扭紋設計顯得更有動感，尾燈內亦加上電鍍邊粉飾。兩架2010年新款凌志豪華房跑同場，揀邊架好呢？豪華內櫳配備、軟熟真皮座椅、貴氣典雅外形及寧靜駕駛空間，兩車兼備，不過GS450h有個更富時尚美嘅鬼面罩搶分。再試揸比拼操控感， GS450h有 3.5公升引擎連電動馬達，馬力總輸出345匹，果然力量澎湃有勁，加埋混能引擎嘅慳油優點，理應勝出。但車價貴成 8萬元，同埋試完GS300，嗰種柔和加速嘅舒適感又有另一種吸引力，我有錢的話都有排煩，因為實在好難取捨。

GS450h Vs GS300