公仔箱論壇 - Powered by Discuz! Board

標題: Prado TX-Edition　平玩暴龍四驅 [打印本頁]

作者: nt1972 時間: 2009-10-30 05:54 AM 標題: Prado TX-Edition　平玩暴龍四驅

越野四驅不嬲有捧場客，話之你香港路面平滑無凹凸，港人在意嘅係筋肉威猛外形，近百萬嘅新 Land Cruiser一樣有市場，不過我卻愛剛到港嘅Prado TX-Edition，暴龍般嘅賣相同四驅規格，車價 50萬，可算係十足台型、半價找數。

唔同引擎　相差 30萬

■中控不設屏幕，設備亦似乎頗為簡約。

ToyotaPrado 2010新款 TX-Edition上場，頂級版行 4.0L V6偈，擺明戰鬥格，但計番官網車價，到港後打埋稅要80萬以上。今日呢款行 2.7L直四引擎就抵玩得多，車價約 50萬，比 V6版起碼平 30萬，同大佬 LandCruiser比更係平一半，雖然馬力減咗 113匹得番163匹，不過喺香港用已經綽綽有餘，我就覺得最緊要有番越野四驅嗰種暴龍筋肉味，呢啲唔係叫孤寒，而係識計數。試一下四驅能力，坦白講，2.7L唔算有爆炸力，但上斜韌力相當足夠，就算勁斜停燈位，起步都係半腳油門，三千零轉自動升波繼續上路，行順咗吊住二千轉已足夠撐長命斜。以近2.5噸車重兼坐四個人嚟計，香港已無乜路面可以難倒佢。

■錶板設計無驚喜，勝在銀色框襯得靚。

■波棍及手掣根部包上真皮，有粗獷感。

■新版體積增大，內櫳闊到似七人車。

■輕輕一按，上半尾門便可獨立打開。

車身變大　內櫳得益

■菱形頭燈係威係勢，但我最 Buy頭燈上為睇盲點而設嘅側鏡。

車款方面，同 LandCruiser都幾大分別，首先鬼面罩由橫式欄柵改為垂直式，配埋近似菱形嘅醒神頭燈，令車首有種高高在上、作勢噬咬嘅氣勢，唔似 09款 LandCruiser咁偏向方形，唔鍾意過度斯文嘅車迷，應該會更為接受 Prado嘅動感賣相。傳統上， Prado比 LandCruiser尺碼細一截，不過新版又大番啲，內櫳直接得益，變得更為闊落，就算全車坐滿，都好似七人車咁鬆動，而且有番同門車系特色，座椅靈活百變，中、尾排都可獨立摺平收起，坐人載物變得無限制。車款靚仔、車價又抵玩，但始終要面對番現實問題。呢架Prado就真係幾入門，電椅、雪櫃、泊車鏡頭、連屏幕都欠奉，一切以實用精簡掛帥。不過豪華可以分兩類， Land Cruiser係「勁豪」，Prado都可以話係「小豪」。後排獨立冷氣、電天窗、電子式尾門、真皮波棍及手掣、全車 14個高級喇叭、 12個安全氣袋等等，咪以為Prado真係無料到。