公仔箱論壇 - Powered by Discuz! Board

標題: Nissan Skyline Crossover鐵人揀車　睇得威得十項全能 [打印本頁]

作者: nt1972 時間: 2009-10-12 06:06 AM 標題: Nissan Skyline Crossover鐵人揀車　睇得威得十項全能

今日嚟咗四個「鐵人」，正備戰三項鐵人賽嘅 Osman、Eddie、啤梨同區俊濤。而我哋嘅主題係：孖住去操練嘅最佳車拍檔。結論係：有線條、有內涵、要斯文、要搶鏡……我多次重申：「講車呀！」但無耐，佢哋又講到女人……

主要乘客：單車
男人揀車，個個都有一番理論同見解，加上呢班男人仲係鍾意做運動，兼夾準備參加下星期香港舉行嘅三項鐵人賽事，當下備戰又會揀邊類車做Partner，孖住去操練呢？「要夠大裝嘢多，起碼要放得落單車啦！」 EO2嘅 Eddie即刻搶答，區俊濤（ToTo）即時附和：「部車唔夠大都要安番個單車架落去啦！」反而 EO2嘅Osman有另一番見解：「就算部車夠大，但只得雙門嘅話，咪又係唔方便放嘢。」有道理。「乜都假！做完運動好熱，要唞凉，所以最緊要係部冷氣勁就真！」好明顯啤梨係幾個人之中最唔捱得啦！勢估唔到Osman突然爆出一句，首次得到全場人士拍手附和，係咩？「最緊要有個司機至真！」做完運動體力透支，手軟腳軟，有個司機代勞又真係舒服得多嘅，又難怪取得全場共識。

■內裝唔算超豪但舒適，加上易操控，唔會喺你疲累時挑戰你。

■要帶埋單車去操練，呢個頂架尤為重要。

有內涵又搶鏡

■做完運動最爽莫過於咁樣做喇！

「又要啱操練用，又要代步，揀部咩車至好？」幾個男人你一言我一語，得出嘅結論係：「身高內櫳大、`承載量大、四驅至好、尾廂又要放到單車泳衣物品等。仲要有線條、有內涵、要斯文、要搶鏡……」我開始疑惑，呢幾個男人究竟係講緊車定係女人呢？「梗係車啦！」咁簡單嚟講，即係要大要靚又要型兼四驅好力，係咪？「最好……」停！「呢部 Nissan Skyline Crossover上個月至正式登陸，全新車型，斯文外形具線條， Skyline底盤330匹馬力連四驅功能，性能高即係有內涵啦……」我未講完班男人就已經走晒去睇車，仲圍埋講到眉飛色舞㖭。男人對車同運動真係好熱衷，Eddie都話今年大家喺體育版同車版中出現得比喺娛樂版多，當然，佢哋依然會娛樂大家。「年尾會參與《極速18米》舞台劇同埋遲啲會擔任亞姐表演嘉賓……」 Eddie話。而啤梨就突然爆響口：「我們結婚了！」原來係佢嘅新歌啫。「我都作緊曲。」ToTo緊接道。你以為個個一本正經講車講工作？錯晒，事實係，採訪加拍攝嘅幾個鐘頭入面，呢幾位男士無論講任何話題，最後都變成同女人有關。我會咁諗：都無可厚非！

Eddie有時都想開快少少，不過呢部車有 330匹，實用唔晒喇！

Osman外形斯文，靚得有線條最好。

啤梨鍾意部車高唔過我，唔使上落車好似攀山咁。

To To斯文得嚟要有實力，又有吸引力搶到唔少收視。

規格
引擎： 3,698cc V6
馬力： 330ps/7,000rpm
扭力： 36.8kgm/5,200rpm
傳動：七前速加減波，四驅
售價：$538,000起

■唔係講笑，佢哋真係影完相就去操練， Sit-up？小兒科啦！

歡迎光臨公仔箱論壇 (http://5.39.217.76/)