公仔箱論壇 - Powered by Discuz! Board

標題: A5穩重TT勁跑S5中間道 [打印本頁]

作者: nt1972 時間: 2009-9-25 07:50 AM 標題: A5穩重TT勁跑S5中間道

正所謂鹹魚白菜、各有所愛，我唔理 Audi A5幾咁闊落豪華、 TT又幾咁公子哥兒，我就偏愛硬頂版 S5。無計， S5將 A5超跑化，又無TT咁過度招搖，中間位啱啱好，不論慢揸代步，抑或踩深油門享受駕駛樂趣，永遠兩邊都 Fit到。

收起野性慢揸順暢

■ quattro四驅咁好玩，點少得兩張仿桶椅，等你坐定定劈餐勁。

恨到流晒口水嘅S5開篷版未有得影，好彩代理都安排番呢架硬頂版畀傳媒過吓癮。當初 S5以寶馬 3系為假想敵，性能更高卻比M3更平，食晒啲想有馬力、更想抵玩嘅中間客。就算跟同廠相比，有 A5嘅穩重風格，骨子裏埋藏TT嘅野性跑意，兩頭都到岸，相當討人歡喜，難怪越嚟越多 Audi S5喺街度行。車一到，乜都唔諗，郁完「凳、鏡、波」即時開車實試。久聞4.2L V8引擎嘅厲害，起步都唔夠太大油，掂住油門逐步漸進，好彩 S5加速都算柔順，喺九龍塘撞正放工放學，路窄又多燈位，慢車而行都好Smooth好舒暢，起碼低波密集式上上落落，都毋須急收急放跑馬仔，對於大馬力嘅車嚟講，有埋恒時四驅更易起步嘅條件下，慢車都一樣易揸的確值得一讚，證明 A5嘅斯文穩重風格，在 S5身上一樣有發揮，返工、去街代步，呢 Part絕對無問題。

■揸咗成個晏晝，充份感受到具有 A5相同核心嘅舒適感。

■快慢都試過，波箱反應迅速，不輸棍波。

■前排座椅設計得立體有層次，未坐先有視覺享受。

■後排算闊落，只嫌坐直身子會稍稍頂頭。

■ S5內櫳多咗唔少碳纖裝飾。

■金屬牌標明四驅優越性。

力量感操控性爽！

■一睇四出式尾喉就知惹唔過，一對似高達眼嘅尾燈相當神氣。

開始認真狠試，無謂嘥咗嗰354匹馬力，穿過獅隧直入新界，上到高速終於可以稍踏油門，轉數上升相當快速，就算齋 D波已經微有推背感，而且明顯感覺到只係「表層」，多多Power陸續有嚟。好多車廠都識一味馬力掛帥，難得 S5喺操控上亦配合得不俗，除波箱反應良好外， Audi引以為豪嘅quattro恒時四驅，對起步加速至入彎咬地性，亦真係有利發揮 S5嘅性能，熟習一輪後漸有信心，試完大彎再遇細急彎，對S5依賴感有增無減，屢屢想試出 S5底線，整個試車過程相當之淋漓盡致，爽！停靠一邊輪到攝影師做嘢，開始靜心欣賞 S5嘅美態。流線車身配合偏斜A柱，雙門 Coupe果真夠晒瀟灑，一對 Bi-Xenon頭燈亦有TT嗰份精悍神髓，車尾亦比好多同級新車更亮眼，起碼一對拉長五角形嘅尾燈，着實令 S5更醒神。 2＋2式座椅，後排上落當然不及四門版，但空間卻比預想中更大，坐兩個肥仔仍然 OK，只係 C柱較斜，高佬長腳妹會稍為頂頭。

■換上金屬側鏡，比同門 A5更有質感。

■五輻式合金軨幾靚都唔係重點，匿埋嘅 S5卡鉗先係好嘢。

■ 4.2L V8偈同之前棍波版一樣，今次就靠自動波箱分勝負。

■巨大鬼面罩已屬 Audi標誌，左側細細個 S5標明性能所在。

規格
引擎： 4,163cc V8 FSI
馬力： 354bhp/7,000rpm
扭力： 440Nm/3,500rpm
傳動： 6速 Tiptronic自動波
售價：$799,000

作者: vinz01 時間: 2009-10-27 06:51 AM

thanks

歡迎光臨公仔箱論壇 (http://5.39.217.76/)