公仔箱論壇 - Powered by Discuz! Board

標題: 輕巧敏捷　富豪都想劈 [打印本頁]

作者: nt1972 時間: 2009-9-22 07:55 AM 標題: 輕巧敏捷　富豪都想劈

一房一廳賣二千幾萬，諗吓都覺高攀唔起，雖然我都啱啱睇完「示範單位」，不過唔係豪宅而係豪車勞斯萊斯 Ghost。到港新車只作展示用途，最特別係車身縮短司機位超豪，擺明要吸引富豪親自上陣做司機。

Sporty過幻影

■招牌勝利女神像，可收藏喺引擎蓋下。

德國法蘭克福車展過咗成個禮拜，有乜勁車新車一早睇過晒，當然勞斯萊斯重頭戲 Ghost，當日都以量產真身登場，唔再係之前嘅初版200EX。香港最叻，全亞洲率先搞發佈會，仲快過中國同日本。雖然 Ghost只屬Pre-production，但同最終售賣版極之接近，不過就唔可以出街落地行，就算李超人嚟到都無得試揸。將可以買層樓嘅錢揼落架車度，毋須想像力，都知坐喺車入面有幾豪幾舒服。聽 Rolls-Royce總經理 Leon講解，原來 Ghost同Phantom（幻影）定位不同，首先車身稍細、車頭稍長，營造出更為 Sporty嘅感覺，車身焗漆引用番200EX嘅絲緞銀色，在金屬色上再噴上一層透明漆，令到引擎蓋、欄柵同玻璃窗框嘅啞銀色，份外幼滑無瑕。車內一如傳統般以鍍銀、真皮同木材配搭，造工精緻，加上每個位腳下均有軟毛地毯，整個車廂散發住濃厚豪華氣息。

■雙出尾喉跟泵把合而為一，低調表達高性能。

■絲緞銀配電鍍銀，光澤暗啞完美配合。

■廠方先以木製模，設計師將每個位改動到最完美。

最好玩嘅勞斯萊斯
無講錯，勞斯萊斯今次真係特別優待司機，因為 Ghost嘅市場定位，係一啲想過吓揸車癮嘅大老闆。 6,600cc V12引擎，最大輸出有成563匹， 1,500rpm已去到780Nm扭力峯值，掂吓油門已經拋離亂咁爬頭嘅死飛仔，最重要係有大堆電子輔助系統幫你發圍，防傾側、動態控制、穩定控制等，加上底盤、車身一體化嘅鋼製車架，有超強行車剛性同穩定性，遇着凹凸爛路，更有最新嘅空氣懸掛系統配合路面升高降低，就算你有本事行盡 Ghost嗰8個波，都包你一樣咁舒適穩定。Ghost新加入不少時興裝備，如左右共四個路面監視鏡頭、無匙撻車、旋鈕操控設備等，最過癮個10.2"超闊屏幕，好靚咁隱藏喺中控台，一撻車自動揭蓋露出，因為畫面比例夠 Wide，左右同時顯示唔同資訊都得，相當之實用。