公仔箱論壇 - Powered by Discuz! Board

標題: 鋼琴戀曲 [打印本頁]

作者: nt1972 時間: 2009-6-19 08:10 AM 標題: 鋼琴戀曲

上個月《轆 Book》喺大阪試過凌志呢架 IS250C，火紅車身配米白內櫳，將開篷車瀟灑活力感充份發揮，整架靚得無話可說。到港Demo車改為黑車黑櫳，從車側睇如一大幅鋼琴焗漆，帶有另一種典雅詩意。身旁伴着溫柔美女，長髮迎風飄蕩，短短一段路，足令駕駛者幻想無數甜蜜戀曲，原來全黑都幾誘人。

■關篷後依然放得落一 Set高球袋。

Demo迅速到港，我亦迅速報名爭試車，但聽靚女公關話皇冠揀咗架全黑嘅 IS250C作試車，心情登時一沉，咁大路，悶唔悶啲呀？遠遠見到實物，果然如凌志Fans喺網上所講，關篷時同舊款 IS250好似，但行近睇，新車感覺完全出晒嚟。首先車身前後各加長 15mm及55mm，近望明顯巨大霸氣，兩側車肩骨位升高，由尾延伸到車前嘅高線條，更有活力動感之餘，亦連帶頭燈角位揚起，活像戚眉瞪眼般醒目，加上全新設計霧燈及 LED尾燈，全車 360度都好吸引。急不及待跳上車，實試號稱全球最快嘅三幅式硬摺篷，官方數字為 20秒，但我計到開篷需 19秒，閂篷卻快至17秒，拍住寶馬架 09 Z4！不過唔好忘記， IS250C用上三幅式結構，比 Z4更精密複雜，但開關篷頂過程流暢迅速，令人又一次充滿驚喜。

■豪裝設備一向係凌志車系特色，照顧不同車主需要。

■車身同軸距都加長咗，令黑色 IS250C格外高貴典雅。

■音響系統會按開關篷，以及道路環境自動調校喇叭聲量，夠體貼。

■ Semi-Aniline真皮椅，齋望已 Feel到有幾軟熟舒服。

轉波急勁爆住上
未撻車，內櫳大堆設備繼承凌志豪玩作風，Semi-Aniline真皮椅軟熟舒服，前排兩個電控座椅有埋冷暖氣功能。最難得單門開篷車連後座都照顧埋，有一排 FullSize座椅空間，大隻佬毋須再怕塞入 DogSeat咁凄凉，細微貼心位仲有前排座椅都係電摺式，一㩒即收，後座乘客上落輕鬆簡單。咪以為凌志淨係識得玩 Hybrid同豪華，查實IS車系乃當年車壇辣霸 Altezza嘅化身，拍住 Aristo都屬多人喪改嘅車種。今趟在港實試， 2.5L V6偈、 208匹，當然唔會同至Top嘅 IS F去比，諗住一個 D波遊吓車河算數。行完東廊再上寶馬山， NA偈呼吸自然順暢，無Turbo車嗰種突兀加速感，坐三人直上大斜，仍然可掂住油門輕鬆爬山，似乎仲有貨喺手。日光日白無乜車，無謂多講，轉用加減Hold低波，玩波棍都嫌慢，嗱嗱聲改用軚盤撥片，二、三波間轉數上落急勁，上斜坡一樣爆住去，幾個急彎都咬得好準，一堆VDIM穩定系統同紮實車架，實在應記一功。

■關篷快至 17秒完成，三幅式摺篷中最快。

規格表
引擎： 2,500cc V6馬力： 208PS/6,400rpm扭力： 252Nm/4,800rpm傳動： 6速+/-波箱，後驅查詢：皇冠車行（ 2511 9430）

Lexus IS250C/預售價$498,000

今個周末到海運大廈，就可親身感受 IS250C有幾豪華靚仔，同場除可以用預售價$489,000出車外（原價$509,200），更有全新色系深魅紫 IS250C展出。日期：本周六、日時間： 10:00am-8:00pm地點：尖沙嘴海港城海運大廈展覽大堂

作者: benc1983 時間: 2009-6-19 11:15 AM

IS250...nice
Convertible...nice

what a beauty...

歡迎光臨公仔箱論壇 (http://5.39.217.76/)