公仔箱論壇 - Powered by Discuz! Board

標題: 意國品味入門選 Alfa Romeo MiTo & Ducati Monster 696 [打印本頁]

作者: nt1972 時間: 2009-6-10 08:22 PM 標題: 意國品味入門選 Alfa Romeo MiTo & Ducati Monster 696

意大利跑車從來都有份如性感女郎般的魔力，就算你幾唔識車，望一眼生理自然起衝動，繼而唇乾舌燥，慾火高燒！不過世上 99% 的車迷荷包乾涸、技術更是有限，一生難望擁有林寶拉利此等狂牛野馬 … … 然而今年意國有女初長成，同樣擁有意大利火辣基因的 Alfa Romeo 及 Ducati 雙雙推出前所未有的平價入門之作，19 萬有找已可擁有由 supercar 演變而成的 hot hatch MiTo ； 10 萬不到就可騎上採用 superbike 科技的 NK 街車 Monster 696 ，而且兩者野性得來容易駕馭，人人都可以一嘗馴獸滋味，做個品味意大利車主！

為慶祝 Ducati 車手 Casey Stoner 獲 07 年總冠軍，兩間車廠 crossover 推出 147 Ducati Corsa ，車身側拉有 Ducati GP7 廠車拉花。

多年來 Alfa 一直有贊助 Ducati 參加 SBK 電單車大賽，最新推出的 MiTo 更是比賽中的 safety car 。

Alfa Romeo MiTo Spec.
一直以來， Ferrari 都是超級跑車的象徵，同集團的 Alfa Romeo 更承襲了大量技術，被視為平民拉利；而電單車界的 Ducati ，地位更與四輪界的 Ferrari 齊名，被譽為二輪拉利，成為 bike 迷 dream car 。而且兩間流着「超級」血脈的同鄉車廠一向關係密切， Alfa Romeo 經常都會跨界別贊助 SBK(Superbike WorldChampionship) 及 MotoGP 兩大國際頂級電單車賽，更是 Ducati 廠隊的 sponsor ，甚至合作出限量特別版新車。難得今次兩廠同類新車齊齊到港，《搵車快線》也跨界別地一同試車，為大家奉上 double 火辣！

Alfa Romeo MiTo Spec.
引擎： 1,368c.c. 直四 turbo
馬力： 155ps/5,500rpm
扭力： 23.5kgm/5,000rpm
傳動： 6 前速手動波箱
重量： 1,145kg
售價： $189,800 （首批優惠價）

Ducati Monster 696 Spec.引擎： 696c.c. V2
馬力： 80ps/9,000rpm
扭力： 7.0kgm/7,750rpm
傳動： 6 前速手動波箱
重量： 163kg
售價： $96,800

超微型 SUPERCAR Alfa Romeo MiTo
人生有幾多個 10 年？最緊要係盡情！但都要睇有幾多本錢，想玩品味意大利車王，全球限量 500 部、只有左軚版的 Alfa 首部 supercar 8C Competizione ，有錢都未必買得到。不過，設計源自 8C 、有如將超流線 supercar 拉高縮小的 Q 版 MiTo卻貴 Jazz 不到 3 萬，比以往最平的 Alfa 147 還要平 8 萬幾，真係人人都可以做品味意大利車主！而且養車意想不到咁平，不單牌費屬最平 1.5 公升以下級別，新1.4 公升引擎耗油更低至 6.5L/100km ，油費平均只需 $0.8/km ，其實即係同部新Jazz 一樣。買揭背車仔想有品味，唔會揀潮爆 Fiat 500 、實用 Golf GT ，死都要揀 MiTo ！

MiTo 流線設計跟足 8C （右），不過齋睇相你絕對估唔到佢得部 Fiat 500 咁細。

啟動 Dynamic mode ，表板才會出現分成 16 格的 turbo 表。

DNA System 分 3 個模式， Dynamic mode 最 sporty 、 Normal 最普通、 All Weather 專 for 雪地。

1.4 公升 turbo 引擎， 155 匹易用，低轉唔算乏力，最好玩係 3,000-5,000rpm 一段的爆炸力。

突發性激情
相信每個人第一下踩 MiTo 的油門，都會嚇一跳！不是因為太勁，而是完全沒有火辣外形預期中的高性能，引擎 2,000rpm 以下冇厘火氣，就算踩到近 3,000rpm 左右着 turbo ，係大力少少，但油門底仍然好似墊咗嚿磚頭，踩極都唔爽，就如 VWPolo 般的歐洲 1.4 公升自然吸氣車種。

不過由九龍灣攞車到彩虹一段，跟車師傅已發覺筆者面露不悅之色，輕描淡寫的說一句：「不如試吓㩒呢個掣啦！」隨即將設於波棍前的 DNA system 掣推到 Dynamicmode ，情況即時戲劇性地 180 度改變！不單表板突然彈出一個 turbo bar 數表，成部車更好似食咗大力菜一樣即時生晒，低轉勁 20% 以上，就算在牛池灣街市一段塞車慢行，市區開開停停鬆極力子一下都已經可以 feel 到；到上清水灣道長命斜一段，部車直頭好似脫韁野馬，爆 turbo 一刻有明顯 turbo lag 感覺，加速癲到Golf GTI 咁勁！不同的是引擎始終只有 1.4 公升， 5,000rpm 打後力量遞增開始放緩，踩到去紅區都再冇 2.0 公升 turbo 車的驚喜，尾段表現未夠癲，不過望望速度表，爆一段上斜直路仔車速已經超過 130km/h ！

意大利車出名 design 講究， MiTo 一樣遺傳優良傳統，車籠靚得可以慢慢欣賞。

入門版只配 16 吋胎軨，但迫力就用到 4-pot 鮑魚，制動力充足。

前座略嫌普通，不過加 3 萬就可以轉頂級版，有齊皮桶凳、自動感光頭燈、 17 吋胎軨連天窗等。

三門設計後座上落不便，空間則與 Fiat 500 相若， 5 呎 7 吋以上後腦會頂尾門骱位，但膝部空間充足。

大戰 300 回合
如果要形容 MiTo 引擎的性感，並唔係好似搞到個  模上手咁簡單，而係好似真係行天橋嗰啲正宗 model 發咗狂咁推低你撲上身上瘋狂法式濕吻！講到揸佢飛大清，就更加係入正題打真軍，互不相讓地用盡各種花式纏綿。因為意大利車天生就有脾氣，一騎上去就好似 5 呎 8 吋港男對住 6 呎混血模，發覺坐姿手長腳短，就得腳位嚟握軚位置又會太遠，連做 heel hoe 都冇咁易，不過愈有脾氣先愈好玩、愈有挑戰性！

在清水灣九淺一深的彎道，揸 MiTo 插入每一隻彎感覺都好強烈，扭軚轉向的幅度、G-force 壓着懸掛的伸縮、輪胎與路面的磨擦，完全零距離接觸，身上最敏感的地方都得到最大刺激。過彎時明顯感到用大兩個碼的 Grande Punto 底盤做咁細部車堅硬度十足，偏硬避震行程適中反應快，掟彎如斬瓜切菜， keep 住轉數出彎大腳篤油，雖然實際車速未必好快，但中段扭力強悍，可以用盡 engine 扯架車出彎，係有少少推頭好似想衝過對面線咁，但車架懸掛又勒得住部車，呢種就出就出、又就住就住死唔出，係要將個過程拖長享受到盡的樂趣，同級之中絕對冇第部車畀到你！

Alfa 終極 fans ：「操控比 147 、 156 仲要好！」
要數香港 Alfa 狂迷， Albert 敢認第 1 冇人敢認第 2 ，本身有餐廳生意都唔做，反而走去西貢開車房專整 Alfa ，比《搵車快線》更早已試過 MiTo 。「 MiTo 係 Alfa近 10 年最佳作品之一，用 Grande Punto 底盤車架夠紮實（ Junior WRC 冠軍車），由於車身夠輕，所以操控比之前出名勁嘅 147 、 156 都仲要好，喺歐洲部 MiTo更加賣到斷市，平時 Alfa 幫新車出完手波版半年後先出自動波版嘅慣例都畀佢打破埋，遲啲出埋 GTA 版肯定更勁。」 Albert 所講的 GTA 版，是 Alfa 專用的高性能型號，雖然 Alfa 都未公布幾時出，不過已肯定會用更辣的 1.7 公升 turbo 勁偈，最大馬力仲有 240 匹。

直接對手︰毒蠍 Abarth 500 esseesse引擎： 1,368c.c. 直四 turbo
馬力： 160ps/5,750rpm
售價： $299,000
特點：同樣係 supermini 級單門車仔，但特別版用齊廠方直屬改裝商 Abarth 勁料，車廂設備比 MiTo 更具玩味，論驚喜程度高過 MiTo 。雖然馬力更大，但加速力與MiTo 相若，而且彎路極限及溝通感差一截，車價更貴近 10 萬！

10 萬有找騎二輪拉利 Ducati Monster 696
跟 Alfa Romeo 同期推出意大利平價新車的，還有被稱為兩個轆界 Ferrari 的Ducati ，在車廠 4 大車系中最賣得、佔半數銷量的 NK 街車 Monster 車系 08 年大轉款，先來最入門的 696 型號，外形同 MiTo 一樣咁似藝術品、馬力更大、操控更易，最重要係 09 年最新版都只係 10 萬有找，比其他郁吓都過 15 萬的 Ducati 車款，已經係最超值享受二輪拉利的選擇。

Monster 696 坐姿微微向前傾，劈彎更加有信心。

前制動配用 Brembo 4-pot 鮑魚，制動力強而漸進，手感良好。

原廠已用上 Sachs 高性能避震機，而且設有多調軟硬調校。

意大利電單車名廠軨牌子 marchesini ，雖然並非最頂級鍛軨，但 racing 款已經型到震。

足料後生 look
Monster 車系 93 年先推出，不過外形一向偏向 classic 款，咁多年嚟轉款都差唔多樣，但 08 年轉款就一改多年風格， Monster 696 注入同廠頂級 superbike 科幻設計，油缸起晒角，車架變粗，用埋電子表板，成部車後生晒兼 racing 味更濃！設計精髓在於同香港最 hit 的街車 Honda CB400 Super Four 一拍埋，就即刻會覺得線條有貴氣好多，大近 300c.c. 的引擎馬力更加多成 27 匹，就好似 Type R 同F430 比，完全唔啱班！不過買四個轆就話要 10 倍車價，但 696 都係貴 CB400Super Four 3 萬幾，一般人都負擔得起！

Ducati收得多你幾皮嘢，同其他 superbike 一樣落足頂級靚料，好似大口徑鋼管及鋁合金副車架設計意念來自 MotoGP 跑車王 Desmosedici GP7 廠車、波箱用 APTC 濕式多片液壓控制離合器、連條原裝孖喉啲低音都實淨過人，仲好聽過一般街車改的 kit 喉，原裝車已經一早幫你改好晒，只怕你冇術同冇品味去欣賞。

上代 695 依然用老土指針式表板，但今代 696 已轉用 hi-tech 數碼電子表板。

Monster 車系傳統的 V-Twin 引擎今代盤頂、活塞及燃燒室都用上 Multistrada1100 和 Hypermotard 1100 勁偈的設計，令馬力及扭力分別增加了 9% 及 11% 。

新手的快車
新牌對住 Monster 696 一樣可以揮灑自如！因為大改款後更加 user friendly ，座高降低到 770mm ， 5 呎 7 吋身高揸，落腳都唔使「跳芭蕾舞」； 163kg 車重比上代輕 5kg ，失手跌車都冇咁難執。而且用人體工程學設計，把手位置亦比起傳統街車低，腳踏位置又移前及調低，令坐姿稍為向前傾，新手劈彎時會有更大安全感。

更細心係 Monster 696 的機械特性亦專為新手而設，極力子磨擦點較長，起步亦唔需要扭大油，鬆極力子時唔會好似跑車咁標住去或易死火，特點同 MiTo 好相似。而且 Monster 車系傳統的 V-Twin 引擎雖然增大到 80 匹，但初段一啲都唔算惡，4,000rpm 以下度力嚟得好線性，就好似 MiTo 用 Normal mode 咁，師奶都唔會嫌佢快；想佢發癲就要 keep 住 5,000-8,000rpm ，爆炸力絕對唔比 Honda 的 VTEC 機器弱，你夠膽質油佢就夠膽去，比 MiTo 高轉玩得更放更興奮！而且因為 Monster696 車身輕兼坐姿低，轉向極之靈活，車架反應亦好快，擺腰攞軚轉向控制如身體一部分。在落清水灣前的迴旋處以較高車速轉 90 度彎，縱使避震較軟，表現仍十分穩定，開油出彎時因輸出線性，亦不會令人手忙腳亂，跟 MiTo 一樣係可以玩到盡的小型車！

Ducati 車主 John ：「獨一無二嘅引擎聲，齋聽已經知係 Ducati ！」

Ducati Owners Club 副會長的阿 John ，平日多以凌志 GS300 代步，但一有時間就會揸部頂級 Ducati 1098S 跑車玩，係 Ducati 的長期忠實 fans ，不如又聽吓佢對呢部 696 有咩意見。

「雖然 Monster 係街車款，同我玩開跑車款唔同，但 Ducati 嘅車全部都好特別，好似呢部 696 用 V-Twin 偈一樣有 80 匹馬力，獨一無二嘅引擎聲齋聽已經知係Ducati 。我未試過部車，但聽過唔少朋友講佢係部好 user friendly 可以日日揸嘅街車，加上 10 萬唔到售價，一定會吸引到好多人買。」

直接對手︰科幻 Aprilia Shiver SL750
引擎： 749c.c. V2
馬力： 95ps/9,000rpm
售價： $92,800
特點： Ducati 意大利同鄉 Aprilia Shiver SL750 ，馬力大 Monster 696 5 匹，而且外形更科幻，雙色車殼更搶眼，一樣主打入門級街車市場。

歡迎光臨公仔箱論壇 (http://5.39.217.76/)