公仔箱論壇 - Powered by Discuz! Board

標題: 爽嘆 240 匹黃金飛魚 [打印本頁]

作者: nt1972 時間: 2009-5-11 08:16 AM 標題: 爽嘆 240 匹黃金飛魚

美少女廚神 A.Lin 一道黃金飛魚（粟米斑塊），冧到水鬼方力申即場加分。呢日我哋借嚟一架改爆 MINI ， A.Lin 試過後唔驚快，仲話夠刺激，梗係啦，240 匹＋ Turbo ，一樣如飛魚般矯捷靈活，襯番拍攝時嘅閃閃夕陽，直頭係黃金飛魚嘅現實版啦。

■ A.Lin 整粟米斑塊畀方力申嘆，今日輪到自己一嚐現實版黃金飛魚有幾快。

心急 o靚妹怕人慢
今日篇稿，本來注意力集中喺改爆 240 匹嘅 MINI Cooper S ，不過車主低調唔願上鏡，搵咗個朋友頂影相，碰啱就係美少女廚神 A.Lin （裴殷），今勻真係車版黃金飛魚重現，多少帶點緣份。「上次我碟黃金飛魚都不知幾受歡迎，班美味天使喺後台食到乾乾淨淨。

我籌備緊出寫真集，要到七月先考車牌，買乜車都係等考到牌先諗，不過我本身都好鍾意 MINI ，細細架又易啲泊車。」咁會唔會買有 Turbo嘅 S ？「咩叫 S ？咩叫 Turbo ？  家坐緊呢架已經好快囉，太快又唔係幾好嘅，但又唔好太慢喎，事關我啲工作表排得好密，經常超趕，若遇到前面啲車慢吞吞頂住，兼且會妖佢。」今日呢架梗係快喇，將部本身已經有 175 匹嘅 MINICooper S ，谷到上 240 匹，千零轉爆 Turbo ，好多新手往往就係被呢下突如其來嘅馬力提升，搞到手忙腳亂，美少女廚神咁急性子，都係揸番無 Turbo 嘅 Cooper穩陣啲喎。

■ 改版 Cooper S 轉向靈活，活現黃金飛魚精髓。

■ 上大斜時最見改裝功力，坐足 4 人依然爆住上。

■ 揭背尾廂越嚟越 Hit ，實用性始終比三廂式為高。

彎路未達極限
呢架改版 Cooper S ，馬力比原廠提高四成，硬生生谷到上 240 匹，全因加入大堆改裝補品，睇見車主張改裝 List ，九成針對 Performance 。近 30 項改件以 Alta為主力，埋單花近 10 萬，單單同引擎相關嘅就花近 5 萬，由 Intercooler 、 19%Supercharger Pulley 到電子整流同油門加速器等，改得都改。走完一段西貢、大清，直路加速真係無嘢講，上大斜行新西貢公路時最試到真章，坐爆四個人依然2,000 轉前着 Turbo ，轉數同時響聲亦好順耳，唔似夾硬谷起副偈。 MINI CooperS 有細車嘅靈活，遇着彎多又雙線行車，攻彎依然咬地無「波 Out 」，制動效果又係改得好好，換上歐系車友最愛嘅 Bilstein PSS9 絞牙避震，設 9 段式調校，車主仍未 Set 到最硬，雖入彎速度同弧度肯定未到極限，不過已有飛魚般嘅靈活跳脫風範。