標題: [新聞] 挨餓生病　主人突失蹤 新界倉狗坎坷的一生 [打印本頁]

---

作者: itsctsu    時間: 2019-3-3 07:23 PM     標題: 挨餓生病　主人突失蹤 新界倉狗坎坷的一生


2年前主人廠房結業後遺下可愛溫馴的小白，幸好遇上在附近做倉務文員的Cherry收留。

「如果我自己養狗，一定唔會咁樣。做倉，養狗嚟做乜？我哋都有曬防盜系統啦！」倉務文員Cherry慨嘆。香港不少地盤、貨倉、工場等都會養狗看門口，可惜並非每位「主人」都願意盡責，有的任由狗隻挨餓生病，有的甚至會拒絕幫狗隻絕育，「怕佢無火啊！唔識看門口囉！」動物義工陳小姐無奈地說。偏偏，政府從無任何倉狗的統計數字，對「主人」的行為又缺乏監管。僅靠「主人」自律，又如何能終結倉狗不幸的命運？

記者：陳麗賢
攝影：何建忠、陳海威、周智堅
剪接：魏利民



Cherry曾數次目睹倉狗被車撞死，因此她認為危險地方如地盤、廢車場等根本不適宜飼養狗隻。


雖然小白遇上新主人Cherry，但過去被遺棄的陰影，仍讓牠變得自卑又欠缺安全感。


動物義工陳小姐指，許多自私狗主拒絕為狗絕育，只怕牠「冇火」看門口，任由狗隻不斷繁殖。


為搬廠棄養忠犬小白　自私狗主傷盡毛孩心
外表敦厚可愛的倉狗小白，在上水一貨倉看門口，沒想到2年前主人突然失蹤，「前業主間公司唔做喇，佢冇帶走小白，就叫我幫手照顧。」Cherry（化名）剛好在附近的廠房工作，不忍心見到忠誠的小白如舊傢俬一樣，被遺在原地自生自滅，決定接收。「（棄養）緊係慘啦，不負責任咁囉。如果冇我，隻狗都唔知畀邊個收養。」小白被遺棄大受打擊，「其實佢開頭真係好唔開心㗎，知道唔見咗主人。佢變得好自卑，成日以為冇人鍾意佢。」

「小白有病有痛，即使傷曬呢，（前主人）都唔會幫佢塗藥水，仲話唔會負責任。我話：『得喇，你畀我整啦！』」收養小白後，Cherry立即帶牠絕育，發現小白患上心絲蟲，幸好及時得到醫治。現在，Cherry每日回到公司都會先為小白抹身，然後提供美味的午餐和無限零食，「有時屋企煮咗雞肉會搭單攞畀佢食！」雖然小白能夠幸運遇上Cherry，但其他倉狗仍面對隨時流離失所的命運。



現時法例對狗主飼養行為的監管十分有限，一些狗隻的生活環境惡劣，甚至要日曬雨淋。


有不負責任的狗主讓倉狗挨餓，迫使牠們在地盤、倉庫外面吃垃圾充飢。


單靠狗主自律，又如何能保障狗隻的權益？


慘過流浪狗　義工見證倉狗餓到食垃圾
「就算啲狗生生死死對於佢哋（狗主）嚟講，佢哋冇所謂㗎，就算死咗咪又去捉過第二隻返嚟囉，佢哋唔覺得係一個生命。」居於大埔村屋的陳小姐（化名），經常義務照顧附近的倉狗，「原來呢啲放養狗，可能生活條件仲差過流浪狗，佢哋冇得食仲會執垃圾食。」她以一人之力守護毛孩的溫飽，卻被自私的狗主阻撓：「我試過畀狗主追出嚟打啊，覺得你係咪嚟偷狗？你有冇咁好心？」部分狗主更拒絕為狗絕育，怕「冇火」看門口，導致牠們不斷繁殖，「你太多狗，可能會對其他村民造成滋擾。」她遇過最可怕的情況，是無良狗主將狗隻隨處棄屍：「我放緊狗嘅時候聽到狗BB『鶯鶯』叫，一打開麻包袋，發現有5隻狗仔凍死咗。」

倉狗的問題在於政府從未提升保障動物權益的政策。以地盤飼養狗隻為例，雖然有漁護署《建築地盤飼養狗隻守則》，指明「地盤管理者必須安排犬隻接受防疫注射、植入微型晶片、領取牌照，並要妥善管理其行為，不得隨便棄養。」可惜，守則並無法律約束力，無助阻嚇不負責任的狗主。

雖然根據《狂犬病條例》「動物畜養人如無合理解釋而棄掉其動物，即屬犯罪」，可是於過去3年，漁護署竟完全沒有就棄養提出檢控。今年，食物及衛生局回應立法會「研究動物權益相關事宜小組」的質詢，亦只表示「檢控難以蒐集足夠證據」，及「漁護署會派員巡查建築地」。對倉狗群體面對的問題視而不見，棄養和流浪狗問題，只會加劇惡化。

---

歡迎光臨 公仔箱論壇 (http://5.39.217.76/)

Powered by Discuz! 7.0.0