標題:
泰利擸走葡京80萬
[打印本頁]
作者:
altooooon
時間:
2008-7-28 10:43 AM
標題:
泰利擸走葡京80萬
泰利擸走葡京80萬
車路士隊長泰利不愧為「英超賭神」，抵澳門後閃電入葡京搏殺，即大獲全勝！泰利前晚及尋日下晝同隊友施治、舒夫真高、布歷治、伊雲洛域及林柏特去葡京賭廿一點，結果於兩日就贏合共八十萬元，計落條數仲好搵過踢波，其他隊友都因為佢帶挈有得贏。
雖然受到飛機延遲影響抵澳時間，但無損泰利等人興致，食完晚飯休息一陣之後，前晚十時半就由澳博幾名高層帶領，由新葡京經特別通道往葡京搏殺。
泰利等人並非去特別賭廳，只係去一間位置較偏娛樂場，佢坐張最低投注額係一千蚊，最大都係二萬，但隔籬張大細，最低投注只係廿蚊，佢都可算賭得親民。
隊長帶挈各有斬獲
泰利不愧為大佬，先安排隊友坐澳博預先安排廿一點賭，自己就去兌籌碼，一行人兌約十萬蚊籌碼，然後就開始搏殺。泰利賭注較大，每鋪約三千至五千，其他人大多係一千。舒夫真高當然知道泰利賭術犀利，差唔多每鋪都問泰利意見，而其餘隊友都會聽泰利話，要唔要牌都係佢話事，當贏錢後幾個球員更會擊掌慶祝。
由於手風頗順，玩一個多鐘之後，有少少斬獲施治先離開，其餘幾人都停手，只係做陪客，睇住泰利玩，最後泰利廿一點贏三十萬，其餘幾人都有幾千至萬多元收穫，約凌晨十二時半就返酒店。
旺到唔捨得走
玩完第一日，泰利見自己旺，昨日下晝練完波，又偷空去賭番兩手，今次就同林柏特及布歷治三人行，泰利專登搵番同一張賭，初頭泰利輸清籌碼，問林柏特借兩萬蚊，呢名「英超賭神」就憑呢二萬蚊籌碼再起風雲，結果一個多鐘頭又贏多五十萬，仲唔肯走，要同行職員催佢要出席簽名會先離開，連籌碼都唔得閒換番錢，即刻返酒店。
泰利不愧為英超賭神，今次入賭場比佢踢波搵得仲多，現時周薪十三萬英鎊泰利，即係港幣約二百萬，日薪約廿八萬，即係每個鐘約萬二蚊，賭場兩日四個鐘就贏八十萬，平均一個鐘贏廿萬，真係好過踢波。
歡迎光臨 公仔箱論壇 (http://5.39.217.76/)
Powered by Discuz! 7.0.0
