公仔箱論壇 - Powered by Discuz! Board

標題: ☆賽馬-賠率的問題 [打印本頁]

作者: 金田Sam 時間: 2014-11-3 07:54 PM 標題: ☆賽馬-賠率的問題

賽馬原來仲有人以為馬匹賠率變動係馬會自行調整,
這匹落飛和那匹回飛全是馬會控制,隔晚設8倍,臨場逐步推去3倍,
有陰謀策略,引人買,或太多人買馬會驚輸所以把賠率整低一啲...
更多怪想法的人大有人在.....奇怪嗎?

聰明的天才以為越多人買就越有信心,無信心時就會回飛...
回飛是沒信心?? 剛才那個有信心的人買咗之後,無其他人買就無信心??
你唔跟我買就信心不見了,很好笑啊,想法也很別緻有趣...
仲有,以為賠率就是一切了....!隔晚6倍同宜家6倍係一樣?
無錯,跑出派彩係一樣,但投注數目就唔同了。

因為....以11月2日賽馬的尾場為例吧
隔晚投注額只係35萬,除稅後派出是28萬7千,14隻馬隻隻有人買,
當時2號馬咁買咗的人加埋係9萬2千,所以係3.1倍大熱門,
當時8號馬加埋得$4400買咗呢隻馬,所以係64倍,大冷門,
9萬2+4千4,其餘的馬人地買咗加埋係25萬3千....

所以....要做假搞郁彩池,隔晚咪得囉!
隔晚買1萬落呢隻馬,變咗29萬5千~ 除 ~1萬4千4,就變成20倍,
唔信自己用計數機計吓? 或者親自隔晚去買最冷的一匹馬一萬試下..
講到咁,仲有人千方百計研究隔晚賠率變動??

早買遲買,有信心買馬的人,果注幾時買都有同樣的信心,
眼光獨到者,佢買咗之後唔會再逐啲逐啲加注再買,貪得意咩?
越近開跑越多人心急亂咁買,亂石投林仲唔知為咩越來越大注,
你買1號30萬,賠率郁咗我又買30萬大你一百萬..1號咪賠率下跌囉,..
其他人見你兩個咁大注,我又跟返你5萬,形成短時間賠率急跌著燈,

以前馬場有窗口可以口講打飛,大聲講2號獨贏一百萬,
旁邊咁多條龍聽到的馬迷可能幾百人加加埋埋再買多一百萬亦唔出奇,
呢隻馬總投注額突然多咗二百萬,想唔著燈(下跌25%以下)都唔得啦...
呢個現像係一班亂石投林的人一齊捕風捉影,貓仔追住自己條尾咁,...

.

-------看圖識字吧.--↓-----------------------
[attach]2973568[/attach]

作者: 金田Sam 時間: 2014-11-3 10:54 PM

本帖最後由金田Sam 於 2014-11-3 10:55 PM 編輯

除咗賠率,一啲普通馬迷對於[落飛黨]的幻想又係千奇百怪....
[著燈]當咗人地係燈神,魔術師,最後開咩燈,就跑埋馬出嚟,
一步一步好似估劇情由第一場起眼中焦點全集中在電算機,
又係同股票市場的股民情況差唔多,望住數字跳來跳去,
競猜最後結果 ....嘿嘿....記住晒個賠率變動過程,套入賽果,
自然乜嘢理由都事後砌得出嚟,真實情況無人理會,一味幻想。

越近開跑,四方八面的馬迷先湧躍投注,唔急唔入屎坑,
總覺得望實晒賠率跳動就會捉到靈感,有時靈,有時唔靈...
居然樂此不疲,奇怪???

真實情況,騎師平時操馬早對每場出賽馬爭勝機會心裡有數,
上風騎師敢接有[order]在身出擊的馬,因為出擊要掉錢落去,
事前無把握話贏的話,求其就叫馬主練馬師落注? 輸咗點先?
下風騎師策騎無[order]的馬,萬一突然間冷門贏咗出嚟?
所謂的[幕後]係由馬主和練馬師聯同其他有勢力人仕組成,
下風騎師突然贏咗冷門? 又臨門落咗重飛,但又唔係自己人落?
唔會懷疑有人起尾注嗎? 一隻馬可贏的機會唔多架....

所以,上風騎師總係騎order馬好神勇一場又一場有表現,
其餘,下風騎師總係出閘笨手笨腳,搞到出閘失機沿途食塵,
大家都係做騎師,水準相差咁遠嗎? 平衡要學嗎? 唔係一早就識咩?
下風騎師都會有馬贏,但絕唔係臨場見住電算機賠率先決定....
哈哈,難明現今的新馬迷們思維係點? 賽前總係無人討論馬匹機會,
但臨場就非常雀躍咁周圍問人地貼士,邊個手風順中咗一場的就跟,
唔係一個而係佔大部份馬迷都係咁,所以宜家電算機的賠率點會唔亂?
臨開跑時由一堆鐘意追住自己條尾的貓,隻隻都呱呱嘈咁轉來轉去,
明明隻馬早五場都無咩戰績或賽績支持今場機會,但有巨注落飛,
呢堆貓仔就覺得唔跟就笨,就會走寶....嘿嘿!!

好多人話賭馬難,十賭九騙,但要明白,騎師練馬師無睇住你買咗咩,
而吩咐騎師去定唔去,佢地?? 點都為咗機會而戰,對手弱機會大先去,
牌面輸蝕比人的除非賠率好吸引先兵行險著搏殺,一般求的係穩陣,
唔操好隻馬,試好晒跑法,同清楚明白同場對手實力係點,點會掉錢落去,
而且掉錢落去係應該一次過,更唔會隨意就幾百萬,練馬師如果咁易中,
咁易贏錢,做一兩年己經賺夠啦,使咩做成世咁辛苦呢?

馬迷們,或著一般平民百姓對於未知的事情總係多幻想.....
幾好,又有故仔聽,一般我就會賽前花好多時間研究,得出每場三兩隻選擇,
然後按照開跑前的臨時賠率定斷各匹機會馬的值搏率,從而揀幾隻嚟買,
你有一百蚊賭本,想贏一千,十倍之嘛,兩隻3倍幾的獨贏2串1,咪有囉,
問題係,邊兩隻而己。

...咁........

..仲要做隻追住自己條尾的貓仔嗎?.............

歡迎光臨公仔箱論壇 (http://5.39.217.76/)