| ||||||
| 上星期微軟喺美國加州搞神秘event，事前狂吹風話有「勁嘢」出籠，搞到網友亂估一餐，以為出新Xbox或者電子書，點知原來係出10.6吋tablet，名叫Surface（http://www.surface.com），分兩個版本：薄版（9.3mm）行Windows RT（簡化版Windows 8），厚版（13.5mm）就行Windows 8 Pro，售價未定（今年第三季推出）。 薄版擺到明單挑iPad（厚版似撼Ultrabook多啲），最抵死係連iPad嘅Smart Cover（http://www.apple.com/hk/ipad/smart-cover）都抄足，喺裡面加個鍵盤，再剔起機背個kickstand撐起部tablet，即刻變身做notebook。係就係好有創意，不過同iPad比，唔夠薄又唔夠輕，電池仲要唔夠iPad襟用，強如Samsung依然未fight得低iPad，連做慣硬件嘅HP，出tablet亦滯銷到要急急腳停產，除非微軟定價極度「進取」，否則…… iOS 6新地圖唔好用 早兩星期Apple（http://www.apple.com）喺 WWDC（https://developer.apple.com/wwdc/）大會 公布iOS 6（http://www.apple.com/ios/ios6/）， 最特別當然係識聽識講廣東話嘅Siri（http://www.apple.com/iphone/features/siri.html）， 以及取代Google Maps（https://maps.google.com/）嘅自家地圖（Maps）。記者第一時間下載測試版（beta版）試玩，發現Siri對廣東話嘅辨識率算OK，「乜嘢」、「我哋」等口語都認得到，只係Siri嘅中文資料庫仲未齊全，問附近有乜餐廳，竟然叫你去幫襯澳門文華東方酒店嘅餐廳！唔好再遠啲！ 至於新地圖，就認真失望，喺WWDC時用三藩市市中心做示範，用新加入嘅Flyover（http://www.apple.com/ios/ios6/maps/）立體地圖功能，好似玩緊3D game一樣，睇晒地形同埋成座3D建築物，仲可以左右轉同埋放大縮細，靚到爆！點知試玩時發現原來得幾個美國地標可以咁玩；香港地圖嘅表現就更加嚇人，全個香港好似用咗超粗微粒菲林拍攝，模糊一片了事！仲有，最大敗筆就係load得好慢，就算用Wi-Fi load一個Flyover地圖，平均要用三至五分鐘，等佢救命真係死得。 用慣Google Maps嘅用家，一定會頂唔順，就算用番網頁版Google Maps，都只得原本app版四五成功力（唔能夠drop pin又冇得用street view（http://maps.google.com/help/maps/streetview/））。最弊係呢啲問題好難喺幾個月搞得掂，到時iOS 6正式推出，真係要睇吓問題解決咗未先好升級。 五月份數碼相機銷量榜 驟眼睇，又係得Nikon同埋Canon梅花間竹霸住個榜，以為悶爆；細心睇，先發現榜內有齊唔同機種，入門單反、大光圈DC、換鏡細機、大感光元件DC，乜都有，真係「百貨應百客」，證明無論sell邊瓣，一樣吸到客。EOS 600D位居冠軍幾個月，但係Canon今個月出咗新一代入門機650D，相信嚟緊都會狂賣廣告力谷，到底Canon可唔可以保持到榜首地位，下個月就有分曉。 數碼相機 第一位：Canon EOS 600D（淨機身$5,880）賣點：最後衝刺，新一代今個月推出。第二位：Nikon COOLPIX P310（$3,280）賣點：大光圈（F1.8）加wide angle（24mm）第三位：Canon Powershot S100（$3,380）賣點：贏夜攝，輸賣相。第四位：Nikon 1 J1（$4,380連10-30mm f/3.5-5.6鏡頭）賣點：多色機吸引女影友第五位：Canon Powershot G1 X（$5,980）賣點：1.5吋感光元件，機仔中最強。資料提供：GfK Retail and Technology Hong Kong Ltd. | ||||||
| 歡迎光臨 公仔箱論壇 (http://5.39.217.76/) | Powered by Discuz! 7.0.0 |