公仔箱論壇 - Powered by Discuz! Board

標題: 醫官吃喝唔得閒禽流肆虐有排煩 [打印本頁]

作者: tyktyk22000 時間: 2012-6-4 12:07 PM 標題: 醫官吃喝唔得閒禽流肆虐有排煩

唔明，真係唔明，如果你係看更，有住客話畀你聽樓上火燭，你會唔會三粒半鐘之後先至拉響警鐘呢？正常當然唔會啦，問題係香港出現咗一個「三粒半鐘響警鐘」嘅不解謎團，實在有必要拜託神探福爾摩斯查一查真相。

成件事係咁嘅，香港再有奪命禽流感個案，確診嘅係長住廣州而有香港居留權嘅兩歲男童，證實感染H5N1病毒。男童病情有惡化迹象，由瑪嘉烈醫院傳染病中心隔離病房轉送深切治療部留醫，磁力共振顯示出現阻塞性腦水腫，情況嚴重。
但凡港人同胞都熟悉呢一種狀況啦，唔理你禽流感又好，話之你豬流感都好，對付疫症最緊要把握時間火速通傳，等全世界提高警惕知所戒備，唔可以延誤時機，更加唔容許隱瞞。
偏偏奇怪現象就出現喺兩歲男童感染個案，上星期五晚上大約八時，醫院通知衞生署男童確診禽流感，衞生署唔知點解要延至晚上十一時三十五分，先至透過政府新聞處發布消息，中間存在三個半鐘頭嘅「神秘空檔」。官方發言人嘅解釋係咁講嘅，必須先跟進調查方可公布消息。之但係有一件事非常之咁耐人尋味，上星期五晚上又係大約八時，大角咀奧海城有一間中式酒樓筵開二十幾席，主人家正正係衞生署，開派對嘅動機係歡送署長林秉恩榮休。換言之，衞生署當時空巢而出尋歡作樂。
好嘞，功夫茶問問大家，醫院都話確診兩歲男童患上禽流感啦，衞生署仲有乜嘢好跟進嘅呢？因乜事幹唔係第一時間拉響警鐘？點解要三粒半鐘之後先至透過政府新聞處發布消息？TVBNOW 含有熱門話題，最新最快電視，軟體，遊戲，電影，動漫及日常生活及興趣交流等資訊。- ]0 k/ ?4 w9 C9 R- B
另外亦有一家嘢惹人遐想，同樣係上星期五，同樣係晚上大約八時，食衞局局長周一嶽拉大隊去南丫島食海鮮，宴請醫管局一眾成員，包括醫管局主席胡定旭。亦即係話，醫院通知衞生署男童確診禽流感嘅時候，衞生署以及醫管局嘅高層巨頭差不多全部正在吃喝玩樂。功夫茶再問問大家，三粒半鐘響警鐘會唔會同管理真空期有關呀？你知啦，晚上十一時三十五分傳媒先至被通知，時間實在太倉促嘞，報道禽流感肆虐危機未必可以咁詳盡，市民知情權變相被剝削。tvb now,tvbnow,bttvb6 ?' {. @( h, R! \ R& i0 U4 P/ ]
禽流感可大可小係人都知，萬一病毒變種人傳人，殺傷力有機會大過○三年沙士瘟疫蔓延時。理應公告天下嘅時候，醫管局食海鮮，衞生署開派對，你話冇造成三粒半鐘真空期，講都冇人信啦！
即係咁，醫官吃喝唔得閒，禽流肆虐有排煩，萬一香港因為周一嶽同林秉恩風流快活而淪為疫埠，死十次都唔夠賠罪！

歡迎光臨公仔箱論壇 (http://5.39.217.76/)