公仔箱論壇 - Powered by Discuz! Board

標題: 臨收工一貪再貪　曾蔭權擇賤固執 [打印本頁]

作者: tyktyk22000 時間: 2012-4-27 10:08 AM 標題: 臨收工一貪再貪　曾蔭權擇賤固執

擇善固執聽得多，有冇聽過擇賤固執？如果有人幫曾蔭權寫一本傳記，書名不妨就叫《痛心特首之擇賤固執》，唔知會唔會暢銷㗎，有人買嚟一把火燒咗佢洩憤都唔定，不過咁嘅書名絕對係貼切嘅。
0 ?% @ d/ C4 g; J- x( y
呢嗱嗱嗱，曾蔭權一貪再貪嘅嘴臉真係唔講得笑。正常而言，香港第一貪官已經被東方報業集團連環揭發貪腐醜聞，好應該收斂一下啦，點不知唔係喎，臨收工嘅離岸特首舔盡每一個外遊機會，趁出訪巴西期間濫用公帑租住五萬四千元一晚嘅總統套房。春宵一刻五萬四，足夠唔少公屋居民交幾年租啦。死性不改成咁，唔係擇賤固執又係乜？
做大嘅既然奢侈成性，做細嘅自然有樣學樣。貪曾出訪巴西同智利之前，香港駐華盛頓經濟貿易辦事處人員以「探路」為名，先後兩次拉大隊豪遊南美洲，連同最終陪伴老細外訪，據講各人機票食宿連雜費合共花費一百六十二萬元，相等於一名普通長者一百二十四年嘅生果金。當然啦，敗家仔一定唔會認敗家，所以香港駐美國總經濟貿易專員唐智強死撐話，因為唔熟悉當地環境同語言，所以有必要預訪，而兩次預訪冇用到咁多錢㗎，只係八十六萬八千元啫。
計功夫茶話齋，探路根本係多餘嘅，巴西官方語言冇錯係葡萄牙文，之但係英文係國際語言，你千祈唔好同人講香港同巴西官僚嘅溝通語言唔係英文，你更加唔好講探路兩次居然神速學曉外語，彼此以葡萄牙文閒話家常，人哋當你傻到唔識講大話㗎。至於當地環境呢家嘢，其實不足一年半之前，財政司司長曾俊華已經同樣訪問過巴西同智利，兩次行程大同小異，莫非之前嗰一班探路先鋒全部燒壞腦失憶？所謂兩次預訪只係用咗八十六萬八千元，捉字蝨啫，其實呢啲錢根本就唔應該使。即係咁，上面嗰個扮總統，下面嗰班扮探路，香港納稅人嘅血汗錢無端端丟落鹹水海。0 O, N* r; Z) L0 R9 {
話口未完，煲呔曾貪腐醜聞又多一單喇。舊年佢同胞弟曾蔭培暢遊惠州，坐嘅原來係某大地產商嘅「御用」旅遊巴，有「空軍一號」之稱，全部係超級豪華按摩座椅設計，仲有防彈玻璃，「坐得舒適，玩得招積」，直頭係帝王式享受。係呢，煲呔曾今次有冇「按市場價格」支付車費？特首辦含糊其詞，睇怕只有貪曾自己至知囉。
其實冇必要繼續狡辯嘞，揮霍就係揮霍，貪婪就係貪婪，立法會議員唔使客氣，一於啟動彈劾程序啦。彈劾特首係就係好瘀皮，不過點都叫做出力維護廉潔奉公嘅核心價值吖，冇理由任得一個貪到出面嘅冒牌總統逍遙法外啫！

歡迎光臨公仔箱論壇 (http://5.39.217.76/)