公仔箱論壇 - Powered by Discuz! Board

標題: 司機座位有隻狗　無法可依嚇到嘔 [打印本頁]

作者: tyktyk22000 時間: 2011-11-26 11:15 AM 標題: 司機座位有隻狗　無法可依嚇到嘔

司機座位有隻狗　無法可依嚇到嘔「頭文字Ｄ」大家可能睇過，就係講賽車嘅漫畫同電影。「頭文字Ｂ」應該都唔會太陌生，就係網上一段短片所顯示，有一對貪玩到傻咗嘅夫婦，居然將自己十八個月大嘅寶貝ＢＢ放於司機大腿之上，作狀控制軚盤駕駛，仲要拍成短片公諸同好。咁大家又有冇聽過更加匪夷所思嘅「頭文字狗」呢？

先講番頭文字Ｂ吖，法院裁定阿Ｂ老竇同阿Ｂ老母危險駕駛，各判一百六十小時社會服務令，並且停牌半年。法官係咁講嘅，如果幼童一時興奮手舞足蹈，有可能影響司機視線，所以呢一對貪玩夫婦犯咗嚴重錯失。所以話啫，大家玩還玩，小心樂極生悲呀。
好嘞，頭文字狗到底係乜乜東東？就咁，有市民途經旺角快富街之時，見到一架黃色私家車沿洗衣街向太子方向行駛，停於亞皆老街水務署對開等候轉燈。呢一位市民望入車廂細心一睇，嘩！司機座位居然有一隻白毛狗狗，坐喺駕駛者大腿之上，前爪更加安置於軚盤，狀況就好似有一隻狗開緊車。
如果你見到咁嘅奇景，你會點做吖？冇錯嘞，喺呢一個舉頭三尺有鏡頭嘅數碼世界，你會即刻開機拍成短片，不排除將危險駕駛嘅罪證交畀警方處理。
咦，咪住先，雖然正常人一眼望落去都覺得大有問題，頭文字狗同頭文字Ｂ都係罔顧安全嘅貪玩行為，之但係咁喎，嚴格而言算唔算危險駕駛呀？功夫茶之所以有咁嘅疑問，原因係運輸署發表咗兩句玄之又玄嘅偉論。該署發言人表示，現時本港無明文規定，動物可否駕車。
喂喂喂喂喂，今鋪大劑嘞！原來無明文規定禁止動物駕車，咁咪動物農莊所有成員做司機都冇有怕？今次頭文字狗，下次頭文字貓，再下次頭文字豬，再再下次頭文字牛……你唔好同功夫茶講，連曾蔭權養嗰幾條錦鯉都可以開車呀，唔止笑死人，真係會嚇死人㗎！
至於運輸署網站所提供嘅溫馨提示，亦冇講清楚狗狗做司機有冇問題，網站淨係咁講：「如車上載有動物，要把動物安置妥當，確保不會騷擾駕駛人。除非狗隻有人牽引，否則不要讓狗隻從車內走到路上。」9 m. [! x4 X3 S" c
你話死得唔死得？司機座位有隻狗，無法可依嚇到嘔，居然冇明文規定是否應該取締動物駕車。萬一頭文字狗被裁定並非違法行為，功夫茶奉勸大家以後都要三步不出閨門，以免一不小心淪為動物司機嘅輪下亡魂。
運輸署唔好玩啦，如果真係無法可依，麻煩官老爺扚起心肝立例管制。狗狗固然唔應該開車，做官亦唔容許戇狗狗！

歡迎光臨公仔箱論壇 (http://5.39.217.76/)