公仔箱論壇 - Powered by Discuz! Board

標題: 個名叫之之有冇運行 - 陶傑 [打印本頁]

作者: go2david 時間: 2011-10-28 07:11 PM 標題: 個名叫之之有冇運行 - 陶傑

在特區做名人，生出來若果係女性，叫做Gigi，陶總發覺，多數有運行。譬如梁詠琪、E位Gigi令港女得西班牙俊男，擺脫輪迴，即時升格為西方歐盟白種人國家之公民，從此海闊天空，香港有咩E郁，例如暴動，阿Gigi有退路，可以坐享地中海陽光印印腳，食巴馬火腿嘆紅酒。走得快好世界，Gigi你就好啦，有鬼佬嫁，教吓我哋港女吖，蒲老蘭幾年，冇著落呀。
黎姿又係叫Gigi，嫁咗殷實富商，入籍澳洲，生對孖女，從此衣食無憂，一樣咁幸福，仲生埋對孖女㖭，更加係街知巷聞。
上一代仲有個Gigi Wong，亦即無綫前當紅花旦黃淑儀，嫁大醫生，八十年代一早移民加拿大，換咗Passport，賞楓葉，睇鯨魚，得閒又可以去溫哥華，唐人街嘆籠蝦餃——嗰度D蝦餃叉燒包，冇化學染料，有文明政府睇住，亦唔係用死蝦死貓狗肉醃製，所以Gigi Wong幾十年都十分之富泰美白，得閒返特區客串TVB甘草角色，又Shop吓平，不知羨煞幾多走唔郁又嫁唔去之香港珠三角女人。
好嘞，女人叫Gigi有運行，男人叫之之呢，嘿，唔到你唔信，就邪到極，Kong U校長之嗰位男版Gigi，做到要俾煲曾炒魷，罪名係「八一八事變」，立場閃縮，唔夠愛國，俾個Kong U禁錮男大喊十兇兩兇，當堂腳軟，心軟、手軟，竟然唔同煲曾、禿曾保持一致，走去同動亂分子「對話」，將Kong U個中山堂台階，變做般鹹道微博天安門。幾百萬年薪請你返來，煲曾連同其頂爺，唔佛都有火就假。
唔聽話，就話之你係明德格物，明德變唔得，格物就要變隔渣。所以煲曾出手，格物炒之，以後生仔，小心改名呀。

歡迎光臨公仔箱論壇 (http://5.39.217.76/)