公仔箱論壇 - Powered by Discuz! Board

標題: [時事討論] 扶貧細眉細眼　紓困唔湯唔水 [打印本頁]

作者: d82622 時間: 2011-9-11 06:04 AM 標題: 扶貧細眉細眼　紓困唔湯唔水

萬金油基金又派錢喇！對唔住，係關愛基金派錢至啱。今次巴閉囉，資助名目繁多，有啲直頭諗都諗唔到添。不過可惜吖，派錢派到細眉細眼，不倫不類，唔湯唔水，都唔知究竟係扶貧紓困定係做騷。公仔箱論壇9 T& m, j1 Q2 V5 [
睇吓點樣派錢喇，包括為低收入長者提供每月最多四百八十蚊家居清潔及陪診服務津貼、為輪候資助學前康復服務嘅低收入家庭兒童提供每月二千五百蚊學習訓練津貼，以及資助少數族裔人士報讀語文公開試等。
本來呢，為有需要嘅低收入人士提供資助，少少無拘，多多益善，有總好過冇。不過咁，如果呢啲資助治標唔治本，姿勢多於實際，咁同做騷冇乜分別嘅咋。以家居清潔及陪診服務津貼為例，先唔講資助額係咪足夠，如果只幫一年咁大把，跟住就無以為繼，咁又有乜嘢意義吖？下一年唔通叫公公婆婆望天打卦？
講嚟講去，港府根本唔肯作長期承擔，所謂扶貧紓困，鋪鋪都係虛應故事，敷衍市民。最搞笑係但凡當局施政失誤，政策甩漏，例牌搵關愛基金執手尾，唔怪得有人話關愛基金係「政治萬金油」咯。
呢盒萬金油又的確幾就手嘅。嗱，預算案派六千蚊派到怨聲載道、醫管局藥物名冊搞到病人「冇錢冇藥醫」、清貧家庭子女冇錢「遊學」、長者冇錢鑲牙，統統搵萬金油「關愛」。弊在萬金油只可以止一時之癢，唔可以根治病患。
關愛基金成立嘅原意，係為綜援網以外嘅「漏網之魚」提供協助。但實情係，基金概念模糊不清，Ｎ無家庭未必受惠，資助項目違背初衷，而且導致社會爭拗不斷，唔怪得商界反應冷淡，唔少人拒絕捐款喇。
正所謂，上帝嘅歸上帝，凱撒嘅歸凱撒，慈善捐款向來由民間主導，宗旨及目標都有針對性，可以令最有需要嘅人受惠。反觀關愛基金好似政治怪胎咁，將政府扶貧責任同民間慈善功能大兜亂，美其名曰官商合作，查實係玩政治化妝，變成煲呔曾政府推卸扶貧責任嘅「關人基金」，簡直九唔搭八。
有人話，關愛基金無所不包，變咗有求必應嘅黃大仙。查實，社會福利開支每年幾百億，仍遠遠應付唔到需求，港府唔肯增加投入，一味諗縮數拉商界落水，根本就係卸膊。關愛基金搞到唔湯唔水，無論當局點樣落嘴頭都籌唔夠數，睇嚟呢盒萬金油都唔搽得幾耐嘅咋

歡迎光臨公仔箱論壇 (http://5.39.217.76/)