你今日打咗卡未呀？Daniel由英國線路收到可靠消息，「紅魔鬼」無良老細格拉沙計劃出新招對付高薪球星，將進行薪酬改革，以上陣場數甚至出場分鐘計人工，直頭好似工廠仔打卡出糧咁，簡直係算死草，咁搞法，唔係「財爺」上身係嘛？

Daniel收到風，格拉沙今次推出惡法，主要因為睇唔過眼有啲長期傷兵白豆人工，矛頭直指被網友稱為「曼聯文員」嘅夏格維斯，呢個藥煲今季長期養傷，若然喺新政之下，真係好難維持生計。今時今日賽事競爭激烈，球員受傷球會出糧本屬天經地義，不過，格拉沙出晒名刻薄，名下美式足球隊坦帕灣海盜薪酬制度早惹批評，今次只係重施故技。

曼聯薪酬改革事在必行，除球員無端端變成工廠仔要打卡出糧外，連主帥費格遜亦被影響，將來留力收起球員隨時換來眾星不滿，到時實左右做人難。另外，曼市出名冇嘢玩，本來球會已經吸引唔到球星，依家仲加多條惡法，令「紅魔鬼」吸引力再減，費Sir想簽巨星？恐怕要落足嘴頭氹人落疊喇。

曼聯官方網頁昨日亦報道，後防重心里奧費迪南傷患加深，有可能缺陣今季餘下賽事，可以提早收咧去追女仔。


無錢就唔好死揸住曼聯唔放啦


copy from 東方報業

雖然小Sun唔係曼聯球迷，但就好憎佢哋嘅班主格拉沙，最近呢位美國班主又諗縮數，話嚟緊所有球員人工會以比賽分鐘計算，如果攞到冠軍先有特別獎金，據講球員知道後都好不滿，但最頭痕一定係費格遜，事關佢老人家鍾意用輪換制，喺新例下試問仲有邊個球員肯抖？


copy from 東方報業