公仔箱論壇 - Powered by Discuz! Board

標題: 上跑下抓混血兒好玩足料 Juke [打印本頁]

作者: nt1972 時間: 2010-7-8 06:42 AM 標題: 上跑下抓混血兒好玩足料 Juke

日產玩 Crossover出晒位，啱啱先試完最新嘅 Qashqai，話咁快富記就返埋另一款混血兒 Juke。呢架迷你 SUV毫不安份，下身玩抓地四驅 Feel，上身卻玩低矮 Coupe跑格，似足一碗艇仔「 Juke」咁乜料都有。

上下交叉一車兩格

■圓渾車尾線條，似番架力量型 SUV。

日產 Crossover幾款車系能夠喺歐洲越玩越紅，全因一個「溝」字，就好似蒲蘭桂坊時遇到嘅混血兒一樣，佢哋嗰種凸出嘅輪廓總會令你眼前一亮。今次日產將雙門跑車 Coupe格，混入四驅 SUV下身，成為新車系 Juke，本來風馬牛不相干嘅車款，又俾佢溝得幾吸引。車身上半玩 Coupe流線型，超斜 A柱一直延伸至車尾，仲要抵死到四門扮雙門，後方門柄隱藏喺較高位置，望落真係好有 Coupe Feel。下身玩番拿手嘅迷你 SUV佈局，車身離地頗高，又闊又厚嘅車胎，再加鼓脹筋肉車頭，整體極具力量感，但又跟上半身斯文 Design出奇地夾。一車兩格，視覺同體感都 Mix& Match，似足百年老舖嘅足料艇仔「 Juke」，每樣餸都咁過癮。

■官方宣傳相內櫳跟番車身用紅色，似乎更吸引。

■雖暫只有入門齋版，不過車廂觀感仍算不俗。

賣相吸引稍嫌齋料

■揭背尾門開閂都好輕巧，仲有油壓防止夾親人。

上年喺東京車展，已見過 Juke嘅 Concept前身，量產化後賣相正常好多，少咗份科幻味，不過車頭仍然誇張搶眼，大燈、細燈、霧燈破天荒分開擺之餘，尖長頭燈更擺喺頭冚側，幾乎要 Top Shot先望到個燈罩形狀，好鬼馬！水貨商暫時只返咗架齋版 Juke到港，由於體積偏向迷你化，基本上可以當細車咁揸，但車身卻有 SUV嘅高度，睇位又比一般細車更好，加上 1,500cc引擎不慍不火，對斯文人士尤其適合，就算師奶或姐姐仔，踩一轉後會發覺 SUV原來都唔係咁難揸啫。1.5L慳油偈、賣相吸引，叫價廿零萬唔算貴，內櫳設備齋咗啲，好彩搵人裝番個 LCD同 CD機都唔算貴，真係要彈嘅，就係悶到爆嘅黑色車身同內櫳， Sell唔到 Juke嗰種獨特玩嘢味，畀我揀，一定要番官方宣傳嗰架火紅色，以及配 Turbo嘅四驅版，有心訂車嘅，不妨同富記商量吓。

■尖長頭燈高高在上，大燈擺番喺傳統位置，超玩嘢。

■左側鏡底設泊車鏡，夠貼心。

■尾門手柄隱藏喺較高位置，扮雙門 Coupe。

■後排座椅可 180°放平，變成特大尾廂。

■ 1.6L唔算有太大爆炸力，不過應付城市路綽綽有餘。

Nissan Juke
引擎： 1,500cc DOHC
馬力： 114hp/6,000rpm
扭力： 15.3kgm/4,000rpm
傳動： Xtronic無段變速，頭驅
售價：$239,000

歡迎光臨公仔箱論壇 (http://5.39.217.76/)