公仔箱論壇 - Powered by Discuz! Board

標題: Wish 1.8暢遊橫濱　縮偈保馬力夠慳家 [打印本頁]

作者: nt1972 時間: 2010-7-6 11:58 AM 標題: Wish 1.8暢遊橫濱　縮偈保馬力夠慳家

之前報道過跟皇冠去日本試車，除咗落 Track大玩豐田 Wish 2.0劈彎，仲可以有機會揸住部新增型號 Wish 1.8暢遊橫濱一整天。同樣以 VALVEMATIC引擎作賣點，即使引擎縮水至 1.8公升，但馬力仍然有 144匹，加埋個七速無段變速自動波箱，暢順無比嘅駕駛感受兼有風和日麗嘅靚景相隨之下，實在帶來愉快好心情。

舊新港碼頭紅色貨倉

Mitsui Outlet

廿一萬入門更抵玩

■牙仔鬼面罩係新一代 Wish嘅標記。

去日本試兩部車都係 Wish，就知佢係今年嘅重頭戲，舊年只得一部 2.0，今年就新增多一款 1.8公升引擎嘅 1.8型號。有人可能覺得無乜必要，但我就覺得兩款型號分工清晰，新款 2.0只得六座版本，打造為高性能跑味 MPV；全新 1.8就係七座位版，以實用為大前提，走回經濟親民路線。再講，兩者相差嘅價錢亦唔少， 2.0要成廿七萬幾， 1.8卻只需廿一萬幾，將入門價大大降低，以抵玩價力抗其他日牌同級對手。雖然話價錢平咗，但豐田一啲都無待薄呢部親民嘅 1.8，同樣換上豐田最新王牌 VALVEMATIC引擎，利用控制進氣閥開關時間及大小，去減低油耗及提升馬力。所以即使引擎容積由 2公升縮至 1.8公升，仍然可以輸出 144匹馬力，比起上一代 2.0仲要多出 4匹，而油耗更成功降至 16.7km/L，以每公升$14油價計算，即係每公里$0.84，點踩都唔肉赤，啱晒一眾愛慳家嘅好爸爸。

■黑色車身若襯上炭灰色輪圈會更有型。

■ ECO模式及 Sport按鈕嘅位置夠晒就手。

ECO Mode為環保出力
既然有咁強勁嘅慳油能力，有機會喺橫濱揸住部 Wish 1.8周圍去影相慢慢試，當然唔可以枉費車廠嘅悉心安排，亦不能浪費四處都係靚景嘅橫濱，由市中心嘅 Cosmo World遊樂場、舊新港碼頭紅色貨倉，到路程較遠嘅橫濱海灣 Mitsui Outlet，真係由朝揸到晚，去到邊影到邊。車身顏色選擇不少嘅 Wish，當日亦有四色現身，被安排上午試黑色，下午試白色，感覺休閒嘅白色更襯橫濱。面對四處綠油油嘅美景，令人更主動用新增嘅 ECO Mode為環保出一分力。跟 2.0最大嘅分別就係 Sport Mode嘅設定，只有 CVT波箱跟循迹控制系統嘅配合，即使欠電軚亦無損轉波反應及力量輸出。暢順舒適嘅操控，再加埋懸掛系統採用軟硬適中嘅麥花臣支柱螺旋彈簧，雖然最後要坐成個鐘頭車先去到 Outlet，但都唔覺攰，一輪瘋狂購物為我愉快嘅旅途畫上完美句號。

■摺合中後排座椅可騰出一個大平台方便購物。

■錶板多咗一盞綠色 ECO指示燈。

■貯物格夠多，可放滿零食。

■尾泵把嘅輪廓喺白車上更搶。

■導航系統係日版車必備，若設計可遮擋陽光會更佳。

■新增自動調校光線高低嘅頭燈更切合用家需要。

Wish 1.8規格
引擎： 1,798cc直四 16雙頂 VALVEMATIC
馬力： 144ps/6,400rpm
扭力： 176Nm/4,400rpm
傳動：七前速超級智慧型無段變速自動波連+/-
售價：$213,800起

橫濱遊船碼頭

歡迎光臨公仔箱論壇 (http://5.39.217.76/)