「紅」牆危危乎 車仔撞得散
文： 黃興桂 17/09/2006
今晚英超超級星期天，兩場至強戲碼同日舉行，雙料娛樂球迷實過足癮，頭場車路士主場對利物浦，「車仔」信心已經回復，一對箭頭杜奧巴同舒夫真高狀態相當好，而利物浦今季後防好差，一支後防曳球隊撞把握能力高前鋒，實在係非常擇使，Peter信主場出擊車路士，1:0同2:0波膽都可一試！
阿仙奴穩守突擊煞食
尾場由榜首曼聯奧脫福鬥阿仙奴，嚴格而言，曼聯今季表現只係平穩，並唔係超班，硬碰阿仙奴冇甜頭。「槍手」上周中歐聯冇亨利踢得仲好，近排佢成日老鼠拉龜，作客對住強敵專心打穩守突擊反而更加好，今晚有力摸和「紅魔鬼」。
本周球壇猛人，Peter不作他選，一定係祖連奴比南布肯奴！呢位里昂中場係當今球壇首屈一指死球王，上周中歐聯對皇馬五次處理死球全中目標，巴西「士哥手」費特入第一球亦係靠佢妙到毫巔傳送！祖連奴巴西解作年輕人，巴西有成千上萬個祖連奴，所以大家要記住呢個粗眉大眼、作風低調比南布肯奴。
^:)^ ^:)^ ^:)^ |
發表於 2006-9-17 05:23 PM
| 
發表於 2006-9-17 09:30 PM
|