細個話SD高達（又稱BB戰士）是小朋友玩意，眨吓眼SD高達已陪伴我們廿幾年成長，小朋友都變成中坑，產品卻愈出愈受歡迎，由模型扭蛋、「機戰」遊戲到電視卡通，逐漸連大人都為這Q版高達瘋狂。最癲是出了幾百款模型後，近期仲合金化推出SDX全新系列，唔使再砌件和上色，一洗以往膠味，令完成度和可玩性大幅提升，難怪到埗唔夠一星期已被粉絲們掃光。
人馬騎士完成度高
作為首款SDX合金BB戰士，第一彈採用騎士高達烈傳版造型，沿用有「BB戰士之父」稱號的橫井孝二設計，由於改以合金製作的關係，摸上手實淨之餘可動性相當不俗，手腳加入球狀關節令擺Pose和平衡更加容易。最吸引是手掌和眼部共有十幾款組件，方便配搭出不同趣怪表情，戰鬥時又可改裝成人馬騎士，以往塑膠 BB戰士肯定造不到這般仔細。
合金配件多
隨身武器裝備一樣咁好玩，盒內伸縮長槍、長短劍、盾牌和盔甲等全部有齊，好似長槍就可扣在身後隨時更換，而長劍則可插入盾牌變成劍盾，連頭盔和斗篷都可以開合移動，細微地方交足功課。初回更附送九十年代大熱的閃卡，確實讓人勾起讀書時砌高達、撏閃卡的回憶。
第一彈SDX騎士高達烈傳版叫好又叫座，但搶唔到貨都不用心急住，皆因第二彈騎士高達全武裝版已定於09年3月推出，主打「三神器」武裝形態，配件比第一彈更多，傳聞仲可以互換裝備。但相對來說售價要6,090日圓（折約$530港元），SD高達粉絲睇怕都要儲定利是錢出擊。
售價：$429
變身人馬騎士時，背後插上雙腳就搞掂，平衡力和靈活性十足。
唔用長槍時，可在盾牌抽出長劍當武器，每個組件都相當精細。
頭盔型拉下來變成衝刺模式，臂膀加入Ball Joint郁動相當容易。
SDX騎士高達融入合金設計，比較塑膠版SD騎士（右）Size細了一個碼。
|
發表於 2009-1-5 01:26 PM
| 
發表於 2009-1-5 01:31 PM
| 
