曼聯賺9.1億冠英超
日前英國傳媒報道，紅魔鬼上年所還利息竟然高達四千二百萬鎊（約六億四千萬港元），數字認真得人驚。不過貴為當今球壇最受歡迎球會之一，單單過去十二個月紅魔鬼就錄得六千萬鎊（約九億一千萬港元）收益，負債多搵錢仲多，緊仲落實去南非掘金，真係「錢」途無限！
曼聯日前公布○六至○七年度財政報告，球會營業額高達二億四千五百萬英鎊，超過上年阿仙奴二億英鎊營業額紀錄，重登英超搵銀最多球會寶座。雖然紅魔鬼淨係還上年利息已經使四千二百萬鎊，呢筆天文數字可以買到五個尼曼查維迪或者三個半基斯坦奴朗拿度，真係誇張！
1200萬鎊斟亨特拉爾
雖然繳付利息唔見一筆，但曼聯搵銀能力就更厲害，連同體育用品商NIKE合約及曼聯電視台（MUTV）播放收入等等，已經幫球隊搵到盆滿缽滿，計未除稅收入，過去一年已經有六千萬鎊收益。根據統計，曼聯fans有成三億三千三百萬人，大約係世界上人口5%，可預期紅魔鬼要超過皇家馬德里，成為世界上最富有球會日子唔遠。
7月再去南非掘金
有咁收入，會方當然想進一步強大球隊，據悉領隊費格遜已經準備動用一千二百萬鎊，收購力阿積士荷蘭國腳亨特拉爾。另外，曼聯將會繼○六年後再次前往南非，今年七月十九日進行季前熱身賽掘金。至於以色列政府亦邀請曼聯五月到訪並且同以色列國家隊進行一場友誼賽，作為開國六十周年慶典活動，忙到咁，曼聯肯定「錢」途無限！
新聞來源：http://football.on.cc/football/new/20080112/fbnewg0001x0.html
哇!!!!一隊波搵咁多錢,皇馬都唔夠頂.............勁!!!!!! |
發表於 2008-1-27 12:30 PM
| 
